علق كل من الفنان شريف رمزي والفنانة هنا شيحة على مشروع القانون المقدم من وزارة المالية لمجلس النواب لفرض ضريبة إضافية على التعليم الدولي.

وكتب شريف رمزي عبر حسابه الشخصي في موقع Facebook، واصفا هذا القرار بـ"عبث العبث": "أنا نادر جدا لما بكتب اي حاجة علي الفيس بوك و بحب احتفظ بآرائي لنفسي او لحياتي الخاصة لكن سمعت ان الدولة عايزة تفرض ضريبة علي التعليم الأجنبي او الخاص و ده لو حقيقي يبقي احنا كده فعلا في عبث العبث".

وتابع قائلا إن الطبقة المقتدرة في مصر وبسبب السياسات الضريبية ستصبح قريبا غير مقتدرة بل ستنفجر: "و أحب أقول ان الطبقة المقتدرة الوحيدة اللي موقفة البلد علي رجليها لحد دلوقتي من كتر ما البلد عمالة تحلب فيها ضرائب و رسوم وبلاوي زرقاء مبقتش مقتدرة و قريب جدا حتنفجر".

أما الفنانة هنا شيحة فكتبت هي الأخرى عبر حسابها الشخصي في Facebook لتعلق على الخبر خصوصا وأن أولادها يتلقون التعليم في المدارس الدولية، وتسألت هنا عن الخدمات التي يدفع المواطن ضرائب لكي يحصل عليها: "ضريبة ايه .. علي التعليم ؟؟؟ التعليم الدولي !!! انترناشونال يعني !؟ ماهو لو تعليم محلي محترم كنّا دخلنا فيه ولادنا !! احنا مجبرين علي الدولي !!! وبعدين ضريبة بقي علي ايه ؟؟!، مصاريف المدارس !!! اه ه ه ه، علي أساس ان مصاريف المدارس بتتحسب ضمن المصاريف المقدمة للضرائب ؟؟!!"

وتابعت:" ولامصاريف الأولاد ولاالعلاج ولا ايجار البيت ولا اقساط العربيه ولا الاكل والشرب الا ما يخص العمل الفني (علشان انا ممثلة) !!!!
بس لازم ندفع ضرائب علي الدخل السنوي اللي خلص قبل ما ييجي علي كل دول بس مصلحة الضرايب ملهاش فيه ..
طب عايزة تحطي ضريبة علي المدارس اللي احنا بندفعها والي إنتي مش معترفه بيها كجزء من دخلنا ليه ؟
وبعدين فين الخدمات اللي بندفع ضرائب علشان ناخدها ؟
فين التأمين الصحي المحترم ؟
فين التعليم الجيد ؟
فين الشوارع اللي مش مكسرة ؟
خلونا ساكتين."

وكان رئيس مصلحة الضرائب، السيد عبد المنعم مطر، أعلن عن إخضاع خدمات التعليم الدولى لضريبة القيمة المضافة الجديد، ضمن مشروع القانون المقدم من وزارة المالية لمجلس النواب.