محمد عبد الخالق

رسائل حرة مباشرة لنجوم دراما رمضان 2025 (النص الأول)

تاريخ النشر: الثلاثاء، 4 مارس 2025 | آخر تحديث:

رسائل حرة مباشرة فنجوم دراما رمضان 2025

- "شهادة معاملة أطفال"- هل الفنان محمود حافظ ممثل بيقدم شخصيات فنية أم شخصية فنية واحدة اسمها محمود حافظ؟

محمود حافظ في "شهدة معاملة أطفال"

- "عقبال عندكو"- إيمي سمير غانم... انت موهوبة ودمك خفيف بجد، ليه بقى بتعملي كده في نفسك؟

إيمي سمير غانم في "عقبال عندكو"

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

ـ "قلبي ومفتاحه"- بحبك جدا يا دياب مغني وممثل ... بس لو مبطلتش تطلع شرير مع زوجاتك في مسلسلات رمضان هبلغ عنك المجلس القومي للمرأة.

ـ "سيد الناس"- أنصح الفنانة الجميلة سلوى عثمان بعد ما تخلص تصوير مسلسلها تعلن عن ورشة لتدريب الممثلات على البكاء في أول ليفل، ومن تجتازه تلتحق بليفل اللطم.

سلوى عثمان في "سيد الناس"

- "معاوية"- معروف يا جماعة ... لا بناخد دين من مسلسلات دينية، ولا تاريخ من مسلسلات تاريخية، ولا تمثيل من أسماء جلال.

- "جريمة منتصف الليل"- رانيا يوسف قالت احنا مش لابسين بدل رقص في رمضان، احنا لابسين حاجات مقفولة زي الجلاليب ... أيوه صح دي جلاليب عارفين عارفين.

رانيا يوسف في "جريمة منتصف الليل"

- "ولاد الشمس"- طه دسوقي ... طلة وحضور وكاريزما ... مصروف له قبول خطير، هو وعصام عمر هيغيروا كل معادلات السوق الكام سنة الجايين؟

طه دسوقي في "ولاد الشمس"

- خلطة "سامي"بدأت تواجه مصير خلطة "السبكي" ... الناس مبقتش عارفه هي بتتفرج على مين والمسلسلات دخلت في بعض.

- "رامز إيلون مصر"أضعف مواسم برنامج رامز جلال، حاول يا رامز تستغل الإمكانيات الضخمة المتوفرة لك وتقدم فكرة جديدة تضحك الناس شوية.

- أيمن بهجت قمر- "دول الدفا مش معرفة ... دول اللي جوه نني العين" ... في إعلان (أورنج)، دي أجمل جملة اتقالت في أغاني رمضان لحد دلوقتي.

- "العتاولة 2"– فيفي عبدة طالعه بدورين ... يهده الـAI

فيفي عبده وابنتها عزة مجاهد في "العتاولة 2"

- "سيد الناس"– المخرج: بصوا يا جماعة أنا عاوز تعبير بملامح الوش.
- إلهام شاهين: بس كده ... طب خد.

إلهام شاهين في "سيد الناس"

- بهاء سلطان "صاحبي يا صاحبي" تتر مسلسل "ولاد الشمس" هو الأفضل حتى إشعار آخر، كلمات منة القيعي وألحان أحمد طارق يحيى.