بسمة داود: اللوكيشن كله بكى أثناء تصوير مشهد المواجهة في "الوصفة سحرية" و"قطة" شيري عادل بهدلتنا في الكواليس

محمد عبد الخالق

محمد عبد الخالق تاريخ النشر: الثلاثاء، 30 يوليو، 2024 | آخر تحديث:

بسمة داود

لفتت الأنظار بدور "نهلة" في مسلسل "الوصفة سحرية"، ونالت تعاطف المشاهدين، عن كواليس المسلسل، ومدى تشابهها ببطلته، تحدثت الفنان بسمة داود لـFilFan.com عن دورها ورأيها في علاقة الصداقة بين النساء، والدور الذي تتمنى تقديمه في هذا الحوار.

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

كلمينا عن رد فعل الجمهور على شخصية "نهلة" في مسلسل "الوصفة السحرية"؟
مشهد المواجهة كان مختلف عن أي حاجة احنا عملناها في دوري، وبعد ما خلصنا تصويره كان في تسقيف وعياط وحزن وتأثر بالموقف كبير جدا، واتمنيت إن اللي الناس حسته في اللحظة دي، يوصل للمشاهدين بنفس الصدق ويسيب نفس التأثر، ومن وقت عرض مشهد المواجهة بشوف كم حب كبير، وفي واحدة قالتلي في اللوكشين أنا حصل معايا نفس اللي حصلك، وقلت نفس كلامك وحسيت نفس إحساسك.

بسمة داود

لو حبيتي تنصحي شخصية "نهلة" هتقوليلها إيه؟
ممكن انصحها إنها متخسرش نفسها .. ونهلة معملتش حاجة، اللي عمل كل حاجة جوزها الأناني الخائن.

شخصية "نهلة" في الوصفة السحرية تشبهك قد إيه؟
أنا ونهلة مختلفين تماما عن بعض في الشخصيات، ولكن هي مهدتلي فكرة الجواز وإزاي أبقى مركزة في كل حاجه وأعمل بيت كويس، مش بحب أعمل حاجه شبهي، لو عملت حاجه قريبة من شخصيتي الحقيقية هتبقى هي دي أنا مش هبقى ممثلة.

بسمة داود

احكيلنا عن مواقف ماتتنسيش في كواليس مسلسل "الوصفة السحرية"؟
مش هنسى قطة شيري عادل لما أي حد كان بيدخل لـ شيري الكرفان كانت بتضربه، قطة شريرة جدا.

الجمهور حب أوي فكرة الصداقة ووقوف الستات جنب بعضهم وجلساتهم في المسلسل لحل أزمة كل واحدة، تفتكري دا ممكن يكون موجود في الواقع ولا النفسنة تحكم؟
الستات صحاب في الواقع مع بعض أكتر من الرجالة، واحنا عشان كنا صحاب فعلا بره المسلسل فده ظهر علي الشاشة، وكان في متعة وقت التصوير وانبساط مجربتوش في أي لوكشن قبل كده.

بسمة داود

هل في أدوار معينة ممكن متقبليهاش بعد الجواز؟
أنا ممثلة أعمل أي دور، لما أعمل دور الطيبة بس مين يعمل الشريرة؟!

مش قلقانة لو اشتغلتي حاجة من تأليف هاني سرحان يتقال إنك اشتغلتي عشان جوزك؟
نفسي اشتغل في عمل من تأليف هاني سرحان حد يوصية عليا، بس الحقيقة مبضايقش أنا نفسي اشتغل معاه أكيد، حتى الآن محصلش إني اشتغلت معاه، بس لو حد هيقول بسمة بتشتغل عشان جوزها مؤلف فأنا بشتغل قبل ما أعرف هاني بكتير.

بسمة داود

إيه الدور اللي شايفاه تحدي ليكي ونفسك تقدميه؟
نفسي أقدم دور أكشن نسائي، قدمته قبل كده في مشهد بمسلسل "كشف مستعجل" وكنت مشاركه فيه ضيف شرف، وطول الوقت بتدرب كيك بوكسينج، واتعلمت ركوب موتسكيلات، وبشتغل علي الحته دي دايما.