نعى الكاتب وائل حمدي صديقه الكاتب والسيناريست شريف بدر الدين الذي توفي فجأة في صباح الأربعاء 17 يوليو الجاري عن عمر يناهز 45 عاما.

كتب وائل حمدي عبر حسابه بموقع X: "هو مافيش كلام يتقال قوي يعني.. شريف بدرالدين الله يرحمه!
امبارح الساعة اتناشر بالليل بعتله ميم عن المسلسل، ونمت.. صحيت لاقيته رادد عليا بضحكة الساعة اتنين بالليل.. وع الواتس اب برضه لاقيت حد باعتلي بيسال (هو شريف مات بجد؟!) فطبعا انا استرجعت كل اللي اعرفهم واسمهم شريف، إلا شريف بدرالدين!".

وتابع: اتنين وعشرين سنة! لما باتفرج على حاجة كاتبينها سوا، عمري ما باميز مين اللي اقترح الجملة دي او مين اللي فكر ف التفصيلة دي! باعرف أميز ف اوقات كتير على فكرة مع كتاب اصدقاء تانيين، بس مع شريف خلاص بقينا بنفكر زي بعض ف اغلب الحاجات!

وأضاف وائل حمدي: ربنا يرحمه، ويصبر مامته واخواته وبناته.. ادعوا لبناته.. الكبار عندهم اتناشر سنة والصغيرة ست سنين، اتولدت قبل وفاة مامتهم بشهر! طب يعني ايه الوضع ده؟! الحمدلله اللهم لا اعتراض!

وكتب وائل حمدي عن مسلسل "مفترق طرق": "المسلسل اللي بيتعرض دلوقت كتبنا الپايلوت بتاعته من ست سنين! وخلصنا شغل فيه من تلات سنين ونص، ولما اتاخر قوي ف التنفيذ وبعدين ف العرض كنت مسقطه من حساباتي تماما وشريف اللي كان متلهف لعرضه دايما وعنده يقين انه الناس هاتحبه قوي.. وفعلا لما اتعرض نجح والناس حبته وشريف فرح بالنجاح، وقاللي "مش قلتلك؟!".. قالها كذا مرة ف آخر كام مكالمة.. الحمدلله اللهم لا اعتراض!"

واستكمل: كنت لسه بافكر قريب ان ربنا من عليّ بنعم كتير قوي السنة دي، ونجاحات ورا بعض، وباحمده، بس طبعا لازم يبقى فيه قلم كده والا الدنيا ماتبقاش دنيا.. الحمدلله اللهم لا اعتراض!

واختتم كاتبا: شريف اصغر مني بخمس سنين.. وعمره ما اشتكى من حاجة يعني.. اقصد صحيا، بس قلق الفجر صدره بيوجعه ووقع.. بس كده.. الحمدلله اللهم لا اعتراض!

ولد شريف بدر الدين في الغربية في عام 1979، حصل على درجة البكالوريوس في المحاسبة من كلية التجارة في عام 2001، ودرجة البكالوريوس في السيناريو من المعهد العالي للسينما في عام 2006.
شارك في كتابة وتأليف عدد كبير من المسلسلات التليفزيونية، ومن المسلسلات التي شارك فيها: "تامر وشوقية، العيادة، الباب في الباب، بسنت ودياسطي، هبة رجل الغراب و طلعت روحى ".

وآخر أعماله التى عرضت على إحدى المنصات الإلكترونية مسلسل "مفترق طرق"، بطولة هند صبري، إياد نصار، ماجد المصري علي الطيب، جومانا مراد، هدى المفتي، وغيرهم من الفنانين، والعمل من إخراج محمد محيي