تامر أمين يرد على الساخرين من ظهوره بنضارة شمس في برنامجه

نهال ناصر

نهال ناصر تاريخ النشر: الاثنين، 15 يوليو، 2024 | آخر تحديث:

تامر أمين

رد الإعلامي تامر أمين على بعض التعليقات الساخرة من ظهوره في برنامجه "آخر النهار" وهو يرتدي نظارة شمس.

وقال تامر أمين خلال مقدمة حلقة الأمس من برنامجه "آخر النهار" على قناة النهار: "امبارح وأنا قاعد بالليل بعد ما خلصت الحلقة قاعد بتفرج في فيديوهات ليا نزلت على السوشيال ميديا وأنا طالع بنضارة شمس عشان موضوع عنيا وشرحت إني عامل عملية تقيلة والمفروض إني أريح والدكتور قالي لو نزلت ألبس نضارة شمس لأن الضوء المباشر في الاستديو يضرك ضرر بالغ".

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

تامر أمين يرد على الساخرين من ظهوره بنضارة شمس في برنامجه

تابع تامر أمين: "لقيت بعض التعليقات اللي نازلة على الفيديوهات يعني ممكن يكونوا مسمعوش الجزء الأولاني ومعرفوش إني عامل عملية، لكن تلاقي تعليقات إيه يا عم دا جاي يورينا جمال نضاراته، حوش يا عم دا الشمس واضح إنها جامدة في الاستديو، إيه هي التناكة وصلت بيه لكده، محدش مفترض للحظة إني عندي أكيد سبب مش طالع في دماغي إني من الأسبوع ده هطلع بنضارة شمس في الاستديو بالليل حبيت الفكرة يعني، لا أنا شخصيتي ولا تاريخي ولا العقل يقول كده، وفي بعض الناس كتبوا ووضحوا".

نرشح لك: محمد فؤاد يحتفل بخطوبة ابنته … بكاء ورقص وغناء وأول ظهور بعد نفي شائعات مرضه

تامر أمين

واختتم تامر أمين كلامه: "أنا مش زعلان منهم أنا الموضوع لا يعنيني من قريب ولا من بعيد أنا مش باخد التعليقات دي بمحمل شخصي أنا باخدها بمحمل عام بحاول اقرأ من خلالها سلوك الناس والمزاج العام، واكتشفت أن المزاج العام في جزء كبير منه هجومي، أهاجم الأول وبعدين أبقى أفهم، القصة صعبة والحياة مش هتمشي كده الحياة بتهون رغم صعوبتها بالطبطة، صعوبة الأوضاع المفروض تخلي الناس أحن على بعض، وقلبها على قلب بعض وكتفها في كتف بعض، مش تاكل وتعض وتهبش في بعض، سلوك غريب ومحدش عارف يفسر السلوك العدواني اللي عند الناس، مش هتهون غير لما نطبطب على بعض مش لما نخلص على بعض".

وكان تامر أمين كشف عن خضوعه لعملية جراحية في عينه قائلا: "الحمد لله الذي ابتلانا، والحمد لله الذي عافانا، والحمد لله الذي شفانا، ربنا قدر ولطف، كان عندي مشكلة كبيرة في عيني اليُسرى، وكان لا بد من عملية جراحية عاجلة وتقيلة".

تامر أمين من برنامجه آخر النهار

وأضاف: العملية تطلبت تخدير كلي، واستمرت 4 ساعات ونصف، وكانت عملية ثقيلة بمعنى الكلمة، والحمدلله الذي قدر فلطف وقدر فهدى، والحمد لله جدا على ابتلائه أنا راضي به، وإن شاء الله أنا ماشي في سكة العلاج لكن وحشتوني، فقررت أن أنزل لحضراتكم ولكن معلش استحملوني".