أحمد شاهين لـ"في الفن": الناس كانت بتقايضني عشان تعرف مين القاتل في "صوت وصورة" وقعدت مع محامي صاحبي للتحضير لـ"مصطفى جاويش"

نهال ناصر

نهال ناصر تاريخ النشر: الأحد، 26 نوفمبر، 2023 | آخر تحديث:

أحمد شاهين

شارك الفنان أحمد شاهين في بطولة مسلسل "صوت وصورة" الذي حقق نجاحا كبيرا وتفاعل الجمهور مع أحداثه طوال حلقات عرضه في رحلة البحث عن قاتل "عصام الصياد"، وقدم شاهين شخصية المحامي "مصطفى جاويش" الذي كان ضمن فريق الدفاع عن "رضوى" حنان مطاوع.

ظهر أحمد شاهين في دور المحامي الذي يحاول أن يظهر كشخص يفهم في كل شيء لكنه في الحقيقة لم يكن يملتك الكثير من الأدوات لمساعدة "رضوى" خاصة أنه في بداية طريقة في المحاماة، جمع بين خفة الظل والجدية، وعن المسلسل وكواليسه كان لـ FilFan.com هذا الحوار مع أحمد شاهين.

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

التحضير للشخصية

في مسلسل "صوت وصورة" يظهر أكثر من نموذج للمحامي، وعن تحضيره لشخصية "مصطفى جاويش" قال أحمد شاهين: "لما جالي الدور أول حاجة عملتها تاريخ الشخصية، بسأل نفسي المحامي من أي طبقة بيتعامل إزاي ومن خلال ده بشوف شكله يهكون إزاي هيلبس إيه وهيتكلم إزاي، وفكرت إني عاوز أقدم محامي مختلف عن النماذج الموجودة وكانت فكرة أنه المحامي اللي حاسس من جوا نفسه أنه مستشار وهو أصلا فاضي، هو عايز يعمل حاجة مهمة بس مش عارف هو شخص فاهم القانون لكن لسه مش عارف يتعامل بيه".

نرشح لك: أول تعليق لهنا الزاهد بعد طلاقها من أحمد فهمي

قدم أحمد شاهين دور المحامي "مصطفى جاويش"

وتابع: "قعدت مع صديق ليا محامي عشان أفهم منه إيه اللي بيحصل".

من القاتل؟

على مدار 30 حلقة كان الجمهور في حيرة من قاتل "عصام الصياد" مع وجود أكتر من مشتبه، وعن هذا الأمر حكى أحمد شاهين عن مواقف كوميدية تعرض لها قائلا: "كنت بروح اشتري حاجة كانت الناس تقايضني عشان أقول لهم مين اللي قتل، يقولولي متدفعش بس قولنا مين اللي قتل".

وأوضح أنه لم يكتشف من القاتل من البداية وقال: "مأخدتش الـ30 حلقة مع بعض، في البداية مكنتش أعرف مين اللي قتل، اللي كان متفق عليه إن أكيد هي مش "رضوى" اللي قتلت".

أحمد شاهين وصدقي صخر وعمرو وهبة

كواليس التصوير

عبر أحمد شاهين عن سعادته بالمشاركة في المسلسل ووصف الكواليس بأنها كانت جميلة والكل متعاون فيها قائلا: "كنا في ورشة عمل بدأنا التصوير في شهر 8 وطول الوقت نشتغل على المشاهد أخلص تصوير وأكلم عمرو وهبة ونقعد نذاكر. الكواليس كانت حلوة جدا اللي عنده معلومة بيقولها للتاني".

كواليس مسلسل "صوت وصورة"

كما وجه أحمد شاهين الشكر للمخرج محمود عبد التواب وقال عنه: "المخرج من أكتر الناس اللي اشتغلت معاها بيهتم بالممثل عايزنا نطلع في أفضل صورة ممكن نعيد كذا مرة تصوير المشهد لحد ما نوصل لأفضل حاجة، أكن ليه كل الاحترام والتقدير، المسلسل ده اللي عمل فيه مشهد أو مشهدين باين وواضح وعلم مع الجمهور".

نجاح المسلسل وأفضل التعليقات

حقق المسلسل نجاحا كبيرا وتصدر قوائم المشاهدة والترند لأيام وعن هذا النجاح قال أحمد شاهين: "في ظل الأحداث اللي حاصلة كون المسلسل يحقق النجاح دا دي حاجة عظيمة وتوفيق من ربنا و أن كل فريق العمل بيحب بعض وقدم كل اللي عنده، شركة الإنتاج وفرت كل سبل الراحة أخدنا وقتنا في التحضير والتصوير وأخد حقه في الدعاية".

كما عبر أحمد شاهين عن سعادته برد فعل الجمهور قائلا: "عملت إفيه في مشهد المحكمة لما المذيعة طلبت منه لقاء قلتلها "إيه أول مرة تشوفي محامي" دا كان إضافة مني، قدمت الشخصية بشكل لايت والناس حبته وبتجيلي تعليقات كتير عنه أن هما قابلوا شخصيات في الحقيقة شبهة كتير تعيلقات الجمهور على مواقع التواصل الاجتماعي أو حتى في الشارع بتسعدني".

الجديد

وبعد نجاح "صوت وصورة" ينتظر أحمد شاهين عرض مسلسل "الوصفة السحرية" وقال عنه: "بصور مسلسل "الوصفة السحرية" مع إسلام جمال وعمر الشناوي وشيري عادل وميرهان حسين وهيدي كرم، هو مسلسل حلو أوي والجمهور هيحبه أنا طالع شخصية "عز" صديق عمر الشناوي هو حاجة لايت عدد حلقاته 45، قصص مختلفة أكتر من أسرة وفي أحداث كتيرة جدا، إخراج خيري سالم وتأليف ورشة هاني سرحان وإنتاج شركة دكتور بيتر ميمي".