طارق الشناوي عن مصطفى قمر: هو في حالة أفول فني وتجاوز في حقي أمام القضاء

نادين يوسف

نادين يوسف تاريخ النشر: السبت، 25 نوفمبر، 2023 | آخر تحديث:

طارق الشناوي

حل الناقد طارق الشناوي ضيفا على الإعلامية أسما إبراهيم في برنامج "حبر سري" وتحدث عن أزمته مع الفنان مصطفى قمر

قال الشناوي "لو أنا حاسس اني مش محايد أو مش متعادل نفسيا مش هكتب لكن غير كدة بقول رأي وممكن حد يكون اساء ليا كثيرا ومش قادر اتحكم في ردود فعلي فمش هدخل الكتابة جزء في دة ومش هكتب عنه"

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

وتابع "اصعب حاجة لما تتجاهل عمل فني وليس الكتابة السلبية بل عدم الكتابة وكأن شيئا لم يكن دي اصعب حاجة"

طارق الشناوي

وعن مصطفى قمر قال "مصطفى قمر لو عمل فيلم أو أغنية كويسة هكتب عنه، ولن أتحدث عن الكلام اللي قاله عليا أمام القضاء لانه تجاوز في حقي وادعى اشياء لم تحدث، أنا عمري ما التقيت بيه وهو بيقول اني مرة روحتله المكتب ومعايا بنت عايزها تشتغل ممثلة ورفض والكلام دة قاله من سنتين وبعد كدة نسي هو قال ايه وقال مرة تانية اني روحتله البيت ودة محصلش أنا عمري ما التقيت بيه ولم احادثه تليفونيا فهو كاذب"

وأضاف "وهو ورط والده في أحد البرامج قال اني ناقم وحاقد وانا تفسيري أن لما بيكون فنان في مرحلة أفول بيبقى صعب عليه يتلقى نقدا لسة كنا بنقول أن كريم عبد العزيز اللي علاقتي بيه كويسة جدا ولما انتقدت فيلم "البعض لا يذهب للبعض مرتين" مزعلش وعمل كدة، لأن جواه قوي على عكس مصطفى قمر هو في حالة أفول واخر حفلة عملها كانت نجوم التسعينيات يعني رايح بالصفة العمرية مش الشخصية فهو في حالة أفول فني ولا يتقبل النقد"

مصطفى قمر

نرشح لك: قبل "عبد الغني" في "صوت وصورة" … نماذج رجال في الدراما المصرية لا تتمنى أي امرأة الارتباط بهم

وتابع "وهو قال اني مشفتش الفيلم وكلهم صدقوه وقالوا كدة لأن أنا مبحضرش عروض خاصة وانا بعتقد أن الناقد أو الصحفي اللي بيحضر عروض خاصة بيرتكب خطأ لكن أنا السينما جمب بيتي وبتفرج على الفيلم مع الجمهور العادي مش جمهور العروض الخاصة اللي بيكون موجود علشان يجامل وانا في السنوات الأخيرة بطلت اروح عروض خاصة ودة اللي خلاه يقول اني مشفتش الفيلم"

وعن بداية الأزمة قال "وانا اساسا لم اكتب حرفا عن الفيلم حتى الآن واللي حصل أني اتسألت في برنامج et بالعربي عن رأي في الفيلم فقلت أنه من أسوأ الأفلام وقبل الفيلم دة كان ليه فيلم فشل اسمه "فين قلبي" وهو شتم فيا على الصفحة بتاعته وكله أمام القضاء"

أزمة طارق الشناوي ومصطفى قمر

وتابع "وانا انتقدت فيلم لإلهام شاهين وقالت اني ناقم ولست ناقد وبعد كدة كتبت كلام إيجابي عن فيلمها "واحد صفر" فهي كلمتني وكانت مستغربة قلتلها اللي بيني وبينك الأفلام"

واختتم حديثه قائلا "أنا بنقد نقد لاذع ودة جزء من اسلوب التناول".

View this post on Instagram

A post shared by Al Kahera Wal Nas | القاهرة والناس (@alkaherawalnas)

كان مصطفى قمر قد هاجم الناقد طارق الشناوي عقب تصريحه بأن فيلم "اولاد حريم كريم" هو أسوأ فيلم حيث قال "فيلم أولاد حريم كريم" من أسوأ الأعمال الفنية على الرغم من أن مخرجه علي إدريس مخرج مهم، وزينب عزيز كاتبة مهمة.

وتابع الناقد طارق الشناوي: "مصطفى قمر عايش على الزمن القديم، ومصطفى قمر في عز فشله كمطرب قرر أنه يعمل الفيلم واللى اشتغل معاه الجزء الثاني الحريم اللى مش مطلوبين أوي في السينما".