ناردين فرج لـ"في الفن": أضفنا جواز "ماجدة" و"عصام الصياد" قبل أسبوع من نهاية تصوير "صوت وصورة" و"لعبنا" مع الجمهور بصور مشهد القتل

نهال ناصر

نهال ناصر تاريخ النشر: الجمعة، 24 نوفمبر، 2023 | آخر تحديث:

ناردين فرج

نجاح كبير حققته الفنانة ناردين فرج في مسلسل "صوت وصورة"، هي "ماجدة علوان" المحامية الشهيرة القوية التي تقف مع موكلها وتدافع عنه بكل الطرق سواء الشريفة أو غير ذلك.

بأداء سلس واتقان للشر تمكنت ناردين فرج من تقديم شخصية "ماجدة علوان" لتنضم لشخصيات درامية شريرة عديدة ستظل في الوجدان، وعن الدور وكواليسه والنجاح الكبير للمسلسل كان لـFilFan.com هذا الحوار مع ناردين فرج.

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

نهاية مفاجئة

نرشح لك: ريهام حجاج تعلن استعدادها لعلاج طفل فلسطيني يحتاج تركيب طرف صناعي

كانت نهاية مسلسل "صوت وصورة" مفاجئة للكثيرين لم يتوقع أن يكون "وليد" أحمد ماجد هو القاتل، سألنا ناردين فرج هل كانت تعرف من البداية من القاتل وماذا حدث في الكواليس وقالت لنا: "بدأنا التصوير وإحنا معانا 6 حلقات وعرفنا القاتل مع الحلقة الـ15 لما اتكتبت، كان في اتفاق أن محدش يعرف مين اللي قتل ويفضل في شكوك عشان الناس تفضل تتفرج، إحنا بدأنا نصور ومش عارفين النهايه رايحة لفين وبدأوا يكتبوا ويضيفوا حاجات مع الحلقات زي مثلا أن "ماجدة" اتجوزت "عصام الصياد" اكتشفت الموضوع دا قبل ما نخلص تصوير بأسبوع وقولت للمخرج للدرجة دي "ماجدة" شخصية شنعية، حتى فكرة "ضرب وافي" اعتقد الحاجات دي مكنتش باينة من الأول لما لقوا الناس شاكة في "ماجدة" بدري ومحدش فينا كان متوقع ده ابتدوا يكتبوا على هذا الأساس".

وقبل عرض الحلقة الأخيرة انتشرت فيديوهات وصور من كواليس تصوير مشهد قتل "عصام الصياد" شاهدنا فيها "ماجدة علوان" وهي تقتله، سألنا ناردين فرج عن هذه المشاهد خاصة أنه لم يتم عرضها وقالت عنها: "في نص المسلسل لما وصلنا للحلقة الـ15 من الكتابة اختاروا أن "وليد" يكون القاتل لأنه أكتر واحد الناس متكلمتش عنه، وطلبوا مننا قبل الفركش بعد ما كنت خلصت تصوير مشاهدي نصور المشهد ده، المخرج قرر أنه يعمل حاجة لإثارة الجدل وجابنا كلنا ودخلنا كلنا بالسكينة وفضل يسأل"ها قتلتيه طيب قولتي له إيه؟؟" هي لقطة للسوشيال ميديا كانوا بيلعبوا مع الناس".

المشهد المسرب الذي أثار الجدل

لوك ماجدة علوان

شخصية "ماجدة علوان" شخصية شريرة وقوية لكن أكثر شيء لفت الجمهور هو إطلالتها وخاصة تصفيفة شعرها وكان هناك تعليقات كثيرة عن هذا الأمر وكشفت ناردين أنها اختارت الظهور بهذا الشكل قائلة: "اقترحت أني مغيرش شعري خالص، في حياتنا العادية مش بنغير شكل شعرنا كتير، و"ماجدة" طول الوقت في المكتب أو رايحة وراجعة من الشغل فطبيعي يبقى دا شكلها، في الأول قعدت مع المخرج ولقيت من تعليماته أن ماجدة شخصية صارمة معندهاش قلب، هي شيك وبتلبس حلو لكن هي شخصية جامدة، حسيت أن الشعر ده هيبين ملامح الوش القاسية مع المكياج لقيت أنه هيضيف للشخصية، أول مشهد صورته كان لما "عصام الصياد" بيصور فيديو أنا قاعدة قدامه متكلمتش ولا كلمة، المخرج "توبة" مكنش عارف إني هعمل شعري كده وهو عجبه وقررنا يبقى دا شكلي طول المسلسل".

ناردين فرج ظهرت طوال الوقت بنفس تصفيفة الشعر

وأوضحت ناردين فرج أنها لم تفضل ارتداء باروكة لأنها لا تليق عليها أحيانا وحتى تظهر بشكل طبيعي.

وتذكرت ناردين فرج أكثر تعليقات الجمهور التي أضحكتها وقالت: "تعليقات الجمهور على شعري ضحكتني جدا، ومش عارفة هما عرفوا منين أنا بستخدم منتجات معينة، في حاجات أنا جبتها واشترتها من برا ولقيت بوست بيقول لو حد عاوز يعمل شعره زي "ماجدة علوان" إحنا بنبيع منتج كذا طيب عرفوا منين هتجنن، أبهروني، مكنتش متخيلة أن الشعر هيفرق كده مع الناس".

تأثر بشخصيات

المحامية في السينما والدراما المصرية قدمت من قبل في أعمال لكن هل ناردين فرج تأثرت بأي من هذه الأعمال أو شاهدتها للتحضير للشخصية؟ تجيب: "متفرجتش على فنانات قدموا شخصية المحامية كمرجع ليا، أنا بتكلم مع المخرج وأخد التفاصيل وبقعد مع مدرب تمثيل نتناقش في الدور، لكن اللي حصل أن المخرج "توبة" سألني إن كنت اتفرجت على مسلسل The undoing، أنا اتفرجت عليه لكن مكنتش فاكرة شخصية المحامية، طلب مني اتفرج عليه تاني، اللي لفت نظري أن لبسها كله مقفول ودا اللي أخدته منها عجبني طريقة اللبس، حسيت ان دا بيدي لوك الصرامة، حتى الألوان اخترت أن كلها أسود ورمادي وأبيض".

إطلالات ناردين فرج في مسلسل "صوت وصورة"

وعن أكثر المشاهد التي أحبتها في العمل قالت إنها أحبت مشاهدها مع صدقي صخر ورامي الطمباري وعمرو وهبة، أما المشهد المفضل هو مشهدها مع نجلاء بدر عندما تكتشف أنها تزوجت من زوجها، خاصة أنه تم إضافة هذا الجزء قبل نهاية التصوير بأسبوع.

مواجهة "ماجدة" و"نرمين"

النجاح

حقق مسلسل "صوت وصورة" نجاحا كبيرا رغم ظروف عرضه في توقيت صعب بعد أحداث غزة وقالت ناردين فرج عن هذا الأمر: "محدش فينا كان متوقع النجاح الكبير ده، لكن كلنا كنا حابين التجربة بسبب المخرج أغلبنا اشتغل معاه وهو مساعد مخرج، لما رشحني للدور كان عندي تحفظات أولا شريرة أوي ومختلفة عني، لكن لما قعد اتكلم معايا وشرح لي هو شايفها إزاي كتير مننا وافقنا بسببه، فكرة أنه أوف سيزون و 30 حلقة وأحنا داخلين بـ5 حلقات أنا لولا المخرج مكنتش وافقت".

ناردين فرج في مشهد من "صوت وصورة"

وأكملت: "شخصية ماجدة قربتني من الجمهور، لما كنت بسمع أن الشخصيات الشريرة الجمهور بيحبها مكنتش بصدق لكن حسيت بده مع "صوت وصورة"".

السوشيال ميديا والذكاء الاصطناعي

ناقش مسلسل "صوت وصورة" فكرة الذكاء الاصطناعي وقالت ناردين فرج عن هذا الأمر: "مكنتش مركزة مع فكرة الذكاء الاصطناعي قبل المسلسل لكن كنت شفت حاجات هي ظاهرة موجودة، و"ماجدة" قالت في مشهد أن لازم يبقى فيه قوانين موثقة تحد من سوء استعماله لأنه بيضر ناس كتير، حلو يكون في تكنولوجيا لكن لازم نعرف نستخدمها".

ناردين فرج

وأوضحت ناردين فرج أنها أصبحت مبتعدة عن مواقع التواصل الاجتماعي منذ فترة حتى قبل أحداث غزة، ولم تعد مهتمة بفكرة عدد المتابعين، تنشر ما تشعر انه تريد مشاركته مع الجمهور أو ذكريات تريد توثيقها.

بين الإعلام والتمثيل

ناردين فرج في الأصل مذيعة لكن مؤخرا أخذها التمثيل من الإذاعة، لكنها حتى الآن لم تأخذ قرار الابتعاد كليا عن التقديم وقالت عن هذا الأمر: "كإعلامية بقالي أكتر من 10 سنين لكن كممثلة بقالي 4 سنين، في التمثيل لسه محتاجة كتير عشان أحس أني وصلت لمكانة راضية فيها عن نفسي، لكن أنا كإعلامية وصلت للشعور ده، مأخدش القرار وهكمل كإعلامية، التمثيل يمكن مشدودة ليه لأن لسه قدامي كتير عاوزة أثبت نفسي فيه وأطور من نفسي".