عمر الشناوي لـ"في الفن": نفسي أقدم شخصية خالد بن الوليد .. ومحدش كان عارف إنني حفيد كمال الشناوي لما بدأت تمثيل

أحمد حتحوت

أحمد حتحوت تاريخ النشر: الثلاثاء، 11 أبريل، 2023 | آخر تحديث: الثلاثاء، 11 أبريل، 2023

عمر الشناوي يتحدث لـ في الفن عن علاقته بطليق زوجته ورغبته في تجسيد خالد بن الوليد

"يوسف" هو أحد نماذج الرجال في مسلسل "مذكرات زوج" التي تعلق بها الجمهور، ومن تقديم الفنان عمر الشناوي، الذي برع في تجسيد الرجل صاحب "العين الزايغة" ولكنه يسعى للتغيير من أجل الامرأة الوحيدة التي لم تغرم به.

والتقى FilFan.com بعمر الشناوي للحديث عن وجهة نظره تجاه شخصيته في المسلسل الذي عرض في النصف الأول من رمضان وعن رحلة تطور قدراته التمثيلية، إلى جانب علاقته لمحمد الكلاني، طليق زوجته.

"زمان كنت عامل زي يوسف"

على الرغم من أن عمر الشناوي لا يتعاطف مع شخصيته في "مذكرات زوج"، إلا أنه يتفهم مبرراته، وقال: "يوسف مش بيحب يارا ولكنه اتأذى من واحدة ومبقاش عنده مشاعر، وبالبنات أدوات بالنسبة له وبقى ينتقل من واحدة للتانية، ولما لقى واحدة رفضاه، علقت في دماغه".

عمر الشناوي وطارق لطفي

وكشف الممثل أنه كان مثل "يوسف" في الماضي، وعلق: " في فترة في حياتي كنت زي يوسف، كنت عايش قصة يوسف، حاليا مش متفق معاه.. كل واحد في البشر بيبقى مقتنع باللي بيعمله وقتها وبعديها ممكن يغير رأيه، أنا كتير برجع ورا وأقول ازاي كنت بعمل كدة؟".

م1كرات زوج

وأضاف: "مفيش حد بيتولد "بتاع ستات"، ميزة التمثيل أنه بيخليك تشوف منظور ناس كتير، وبتعود نفسك على منطق الشخصية وبتختارلها مبررات، وعشان كدة حسيت إن تصرفات "يوسف" منطقية".

نرشح لك: سارة الشامي لـ"في الفن": بابا كان رافض دخولي التمثيل .. ولم أقرأ كتاب "مذكرات زوج" لهذا السبب

عمر الشناوي وسارة الشامي

وأشار عمر إلى أن "التوكسيك" صفة مكتسبة، وعلق: "أي شخص توكسيك ناتج عن أذية اتأذاها .. مفيش حد بيتولد توكسيك".

تطور ملحوظ في الاختيارات والأداء

عبر الممثل عن سعادته بردود أفعال الجمهور التي تطورت من الانبهار بمظهره إلى الانبهار بتمثيله، وقال: "لما دخلت التمثيل مكنتش فاهم التمثيل واتشرحلي غلط، ولما مثلت جدي كان متوفى فهو عمره ما شرحلي التمثيل، وفي ناس بتدرس أنا ملحقتش أدرس، أنا عملت تجارب أداء عن طريق الصدفة، واتقبلت وخدت دور وأنا معرفش أي حاجة، كنت ببقى خايف وصوتي كان بيبقى مكتوم، محدش كان عارف إنني حفيد كمال الشناوي".

وكشف الشناوي أن التطور في اختياراته الفنية ناتج عن كثرتها: "ساعات الأعمال المعروضة عليا كتير فبختار بمزاجي، وساعات بتبقى قليلة فبختار بس عشان أنا محتاج شغل، وفي الأول كنت بعمل أي حاجة حتى لو مش لايقة عليا وعواملها مش كويسة، بس بوافق عشان عايز أتعلم وأجرب".

علاقته الصحية بطليق زوجته محمد الكيلاني

ردًا على وصف الجمهور بأن حياته العائلية مثالية، قال عمر الشناوي: "مفيش حاجة في الدنيا مثالية، بس محدش هيحط مشاكله على السوشيال ميديا، والجواز فيه الحلو والوحش، المهم يكون الحلو أكتر، لكن مفيش علاقة طول النهار سعيدة".

عمر الشناوي وابنه وابن زوجته

كما تحدث عمر عن علاقته بمحمد الكيلاني، طليق زوجته هند حداد قائلًا: "أي راجل مش بيحب يدخل علاقة مع ست عندها ابن من طليقها اللي موجود في الصورة، وممكن تحصل مشاكل زي الغيرة، لكن من مصلحة "حمزة" إن يكون والده في الصورة، واللي ساعدني في إنني أصل للمرحلة دي إن محمد الكيلاني عاقل، وأول مرة قابلته مكنتش عارف أنا مقبل على إيه وهتصرف إزاي، لكن هو كان أحسن مني وكان شخص سوي وأنا تعاملت على أساس دة".

"مسلسل مذكرات زوج مش بيكرهني في الزواج"

أعرب الممثل عن إعجابه بمسلسل "مذكرات زوج" بسبب طبيعته الطريفة، وقال: "بيدي معلومات عن الزواج بطريقة خفيفة ومش بيكرهني في الجواز، لما اتفرجت حسيت إن رؤوف عنده حق إنه مش حاسس بقيمته لأن مراته كانت مهملة للبيت، والمسلسل عرض دة بطريقة طريفة".

عمر الشناوي

"لو المشاهد الجريئة حقيقية، معنديش مشكلة فيها"

يرى عمر أن المشاهد الحميمية مستوحاة من الواقع ولذلك لا يمانع تقديمها، وقال: "القتل شيء جريء بس الناس ببتقبل تشوفه رغم إن دي من أبشع المعاضي، لكن تيجي عند الخيانة وتقول دي مش مبادئي؟ وفي مسلسل "100 وش" كانت الناس مبسوطة بالفرجة على حرامية.

عمر الشناوي

أعمال المستقبل ورغبته في تجسيد خالد ابن الوليد

أثناء حديثه عن مسلسل "النزوة" المأخوذ عن الأجنبي The Affair، ذكر عمر الشناوي رغبته في تنفيذ أعمال تاريخية، وقال: " في أعمال أجنبية كتير نفسي نعمل منها نسخ مصرية، نفسي ناخد قصص تاريخية وتتعمل بإنتاج قوي، زي فيلم 300، في غزوة إسلامية اسمها مؤتة، لما خالد بن وليد جاله 300 وكانه مزنوقين في حتة ليها مدخل ضغير وكان جيش الروم فيه 50 ألف، بس الـ300 كسبوا".

عمر الشناوي

وأضاف: " احنا دولة تاريخ من أيام الفراعنة فليه منعملش أفلام عن دة؟ دة الأجانب بتعملها"، كما قال أنه يرغب في تجسيد القائد الإسلامي خالد بن الوليد في عمل فني.

وكشف لنا عمر الشناوي عدد من المخرجين الذين يرغب في العمل معهم في المستقبل وهم: "كاملة أبو زكري، تامر محسن، محمد شاكر خضير، كريم الشناوي".

يستعد عمر الشناوي لاستئناف تصوير فيلم "الهجام" المقرر عرضه هذا العام للمخرج مرقس عادل، وقد انتهى مسلسل "مذكرات زوج" من العرض على التلفزيون في النصف الأول من رمضان، والآن هو متاح على منصة Watch IT.