نشر المطرب تامر حسني عبر موقع التواصل الاجتماعي "انستجرام" فيديو للمخرج والمطرب أحمد ثروت نجل الفنان محمد ثروت بعد إصابته بمرض مناعي نادر "ميلر فيشر" وسفره للعلاج بالخارج.

وكتب الفنان تامر حسني: "أحمد ثروت صديقي وابن الفنان الغالي اوي المطرب الكبير محمد ثروت بمنتهي الحب والرضا والإيمان تقبل محنه كبيرة من ربنا انه يصاب بمرض نادر يأثر على رجله وميمشيش، وكان بيحضر لزواجة، وفي كلامي معاه قولتله انا كنت بكلمك اهون عليك والحقيقة لاقيته مش محتاج وهو من إيمانه بقضاء ربنا مهون على نفسه ونفسيته في أعلى درجات الرضا بيهزر ومبسوط، قولتله بأيدك تحول المحنه لمنحه وقالي أنا بعمل كده دلوقتي وفاهم الاختبار كويس وهنجح فيه وهخف وهمشي تاني على رجلي.

وتابع: وفضل يحكي طول المكالمة عن حب أسرته واهتمامهم بيه واخلاص خطيبته وقد ايه الموقف بين معدنها الأصيل وازاي بتسانذه وبتسهر على رحته طول الوقت، انا كمان بشكرهم وبشكرها جدا وبحييها على قلبها وتربيتها الأصيلة.

وأضاف: ربنا يشفيك يا أحمد ويفرح قلبك بقدر ثقتك العظيمة في ربنا، الثقة العظيمة الي انا شوفتها النهاردة وافرح معاك في فرحك قريب ان شاء الله، ادعوله معايا يا شباب ربنا يشفيه ويشفي كل مريض.

وسافر المخرج أحمد ثروت نجل الفنان الكبير محمد ثروت، الخميس إلى ألمانيا لاستكمال رحلة علاجه، بحسب ما كشف عنه عثمان بدران صديق أحمد ثروت.

ونشر بدران، صورة له مع أحمد ثروت بالمستشفى، عبر حسابه على "فيسبوك"، وعلق: "من فترة كنت كتبت على قصة الضغط العصبي وإن مفيش حاجة مستهلة وده كان بسبب حبيبي وصديقي أحمد ثروت اللي عنده ٣١ ولا ٣٢ سنة وهو عنده شركة في مجال الدعاية والإعلان.. زميل صنعة زي ما بيقولوا ومن شوية ضغط في الشغل في خلال السنوات اللي فاتت جات له جلطة في عينه الشمال والحمد لله بتتحسن ولكن تطور الموضوع أكتر وجه له مرض في الأعصاب نادر أوي أوي اسمه "متلازمة الميلر فيشر" و ده مرض بيجي ١٪ في المليون بيخليالجهاز المناعي يهاجم الجهاز العصبي وحاليا مأثر على رجله الشمال تماما واليمين بنسبة ٥٠٪ زي ما أحمد قال لي".

وتابع: "الحمد الله عزيمة أحمد في حتة تانية خالص وبيهزر وبيضحك ومؤمن ومبسوط إن ربنا اختصه.. بس النهاردة يوم مهم جدا.. أحمد سافر لألمانيا علشان المرض ده محتاج مركز متخصص لعلاجه والنهاردة هيسحبوا عينه مياه من المخ علشان يحددوا الموضوع أكتر ويحطوا بروتوكول للعلاج بإذن الله".

وأضاف صديق أحمد ثروت: "بناء علي نتيجة النهاردة هيتحدد حاجات كتير أوي.. فضلا وليس امرا ندعي لأحمد لعلكم أقرب الى الله إنه يشفيه ويهون عليه ويربط على أبوه الخلوق الجميل محمد ثروت وأمه وأخته وخطيبته".

على جانب آخر، كان الفنان محمد ثروت، كشف عن طبيعة الحالة الصحية لنجلة المخرج أحمد ثروت، قائلا: "الحالة الصحية لأحمد غير مستقرة وحالة نادرة جدا تصيب واحد في المليون يتم علاجها باستخدام الأجسام المضادة والتي تسبب الآم شديدا جدا" .

وتابع ثروت، في مداخلة هاتفية مع الإعلامية إيمان الحصري، ببرنامج "مساء دي إم سي"، المذاع على قناة "دي إم سي": "أحمد يُعاني من ألم شديد خلال الأيام الأخيرة، والفريق الطبي برئاسة الدكتور محمود حميدة يبذلون جهود كبيرة معه"، موضحا أن نجله لم يعاني من أي أمراض خلال السنوات الماضية.

أحمد ثروت محمد ثروت

وأضاف محمد ثروت: "أحمد ثروت عمله كان يشغل كل وقته وهو سبب عودتي للوسط الفني من جديد بأغنية يا مستعجل فراقي، وأغنية هنسيب لمين الغُنا، وحفل مناجاة، بجانب العديد من الأعمال الإخراجية لوزارة الداخلية ووزارة الدفاع وآخرها إخراج حفلة قادرون باختلاف النسخة الرابعة والتي نالت إعجاب الجمهور ونالت التقدير من القيادة السياسة".