علقت مقدمة البرامج ياسمين عز على أغنية النجمة الكولومبية شاكيرا الجديدة التي تحدثت فيها بتلميحات مبتكرة عن حبيبها السابق ولاعب برشلونة جيرارد بيكيه وحبيبته الحالية، كلارا كيا مارتي.

وقالت ياسمين عز في برنامجها "كلام الناس" بتفكرني بالفنانة الكبيرة شويكار لما غنت وقالت "ما هو أصل قليل الأصل يسيب الأصل وياخد الصورة"، أنا مقدرة وجعها وحرقة قلبها على راجلها الست دي مليارديرة ونجمة النجوم وعندها معجبين من العالم في كل حته بس الست ست مهما كانت هي مين أو معاها إيه، التلقيح أحيانا بيكون شكل من أشكال الوجع والندم على الانفصال بس، النهايات أخلاق يا شاكيرا.

وتابعت: ليا أكتر من عتاب عليها، حبيبة قلبي الموضوع خلص سواء أنتي الغلطانة أو هو ولادكم ملهومش ذنب تبقى سيرة أبوهم على كل لسان مينفعش ابنك يروح المدرسة وأصحابه يتريقوا عليه، أنتي قولتي لما انفصلتوا انفصلنا علشان مصلحة أولادنا، ولا عشان الراجل ساكت بتكتبي في الأغنية هجاء بتلقحي عليه وتهاجميه مينفعش، البني آدم مننا طاقة الراجل هيعبي ويشيل في قلبة لحد لما ينفجر ومتعرفيش بيكيه رد فعله إيه، الراجل عشرة 12 سنة ولا عمره وقف في طريق نجاحك حاولي تفتكري ليه حاجة من الحاجات الحلوة.

نرشح لك: أول ظهور لـ إيمي سمير غانم بعد الإنجاب (فيديو)

وأكملت: لو عاوزة تلومي حد أنه سابك لومي نفسك محدش معصوم من الغلط، أنتي من وقت ما انفصلتوا بتصدري للرأي العام أنه خانك مع واحدة تانية بس اللي عرفناه من بعض الناس الثقة أن بيكيه مكنش متحمل فكرة أن صوتك عالي وبتزعقي بمناسبة ومن غير مناسبة ودا واضح من الأغاني بتاعتك بتحبي الصوت العالي طبقتك عالية، قوليلي مين راجل يستحمل كده يروح النادي وأصحابه يقولوله مراتك ممشياك وعرفت أنه لفت نظرك أكتر من مرة وأنتي ولا هنا بل بالعكس أحيانا كنتي بتقصدي تحرجيه ودي أسرار بيوت ومحبش أدخل فيها، وإيه المشكلة لما يكون ربنا كرمك ومعاكي فلوس كتير وجوزك يميل عليكي ويقولك يا حبيبتي تعبت من الشغل وبفكر افتح مشروع ومزنوق في قرشين منك بين الأزواج مفيش مشكلة لو أنتي مش هتقفي مع أبو عيالك مين هيقف معاه؟

حمل آبلكيشن FilFan ... و(عيش وسط النجوم)

جوجل بلاي| https://bit.ly/36husBt

آب ستور|https://apple.co/3sZI7oJ

هواوي آب جاليري| https://bit.ly/3LRWFz5