حسام حبيب: شيرين اللي أقنعتني بالرجوع وهتاكلني علقة بعد الكلام دا

مروة لبيب

مروة لبيب تاريخ النشر: السبت، 12 نوفمبر، 2022 | آخر تحديث:

شيرين وحسام حبيب

كشف الفنان حسام حبيب تفاصيل عودته للفنانة شيرين عبد الوهاب بعد خروجها من المستشفى وتخطي أزمتها الصحية.

وفي مداخلة هاتفية مع الإعلامي عمرو أديب ببرنامج "الحكاية" قال حسام حبيب " شيرين اللي أقنعتني بالرجوع" قبل أن يقاطعه عمرو أديب " طبعا هي زعلت دلوقتي وزغزتلك الزعرة بتاعة شيرين بتاع الحاجب ونص"، ليرد حسام حبيب "هتاكلني علقة بعد ما أقفل".

وأضاف حسام حبيب " احنا زي أي اتنين في الدنيا خناقتنا هبلة وعبيطة وزي أي أتنين في الدنيا، وحياتنا لما تبقى مفتوحة على الناس، هو اللي بيكبر المواضيع، والسوشيال ميديا، والناس اللي بتقول كلام متعرفوش، لكن إحنا بساط جدا، وخناقتنا زي أي اتنين في الدنيا".

نرشح لك: شيرين عبد الوهاب: تنازلت عن كل القضايا ضد شقيقي ... لا يمكن أرضى لأمي تبكي بسببنا

وأضاف حسام حبيب " اتكلمنا قبل ما نرجع، حطينا قواعد، كل واحد محتاج يركز في حياته، وحياتنا احنا الاتنين مع بعض تبقى مقفولة علينا، وحطينا كل واحد أهدافه، وإيه اللي كان مضايقة في التاني، قبل ما تحصل المشاكل دي كلها، وعدنا بعض كل واحد فينا هيشرف التاني، يبقى عايز التاني يبقى مبسوط بيه، وفي نفس الوقت حياتنا الخاصة دي لينا إحنا بس، مش لأي حد تاني، وأنا بحبها، أنا عاذر كل واحد خايف عليها، وهي فعلا عدت بأوقات صعبة، وأنا زعلان عليها، ومش هعرف أوضح لكل حد حاجة، وأنا مبحبش أدافع عن نفسي".

عقد قران شيرين عبد الوهاب وحسام حبيب

وكانت النجمة شيرين عبد الوهاب قد أكدت في مداخلة هاتفية مساء أمس "الجمعة" مع الإعلامي عمرو أديب أنها عادت للفنان حسام حبيب وتم عقد القران، وأنها تعد جمهورها بأنها في أمان، ولن تتحدث مرة أخرى فيما يخص أمور بيتها، مشيرة إلى ان الإعلامية نضال الأحمدية أرسلت لها هي وحسام باقة ورد.

عقد قران شيرين عبد الوهاب وحسام حبيب

وقالت شيرين عبد الوهاب: "تم كتب كتابي على حسام جبيب امبارح الساعة 9 بليل بحضور أقرب الناس لينا، أخواتنا وبطمن الناس عليّ وعايزة استغل الفرصة دي واقول اني بعتذر لحسام عن كلام صدر مني في يوم من الأيام".

حسام حبيب يمضي على عقد قرانه

وتابعت: كنت السبب أن الحياة دي اتفتحت على الناس والناس دي انشغلت بيا ضمن مشاكلهم، فأنا في عصمة رجل طيب جدا ولو كنت قولت كلام عنه فهو كان مزعلني فدا شيطان بيحصل بين المتزوجين، واحنا كان معمول لنا حاجة كبيرة أوي واتفكت الحمدلله، أنا اصغر من الكلام عن الأعمال لكنها ذكرت في القرآن واحنا مش معصومين من الغلط ،أنا غلطت لما طلعت اتكلمت بصوت عالي، أنا شيرين اللي طلعت واتكلمت والحقيقة كل حاجة كانت في العلن زعلي كان في العلن وحبي كان في العلن وكله كان في العلن.

شيرين أثناء عقد قرانها

طالع أيضا: عقد قران شيرين عبد الوهاب وحسام حبيب للمرة الثانية - صور وفيديو

وعلق حسام حبيب على تصريحات شيرين قائلا: "أحنا حياتنا زي أي اتنين متزوجين، أحنا اتكلمنا قبل الرجوع واتفقنا على قوانين وقواعد، وحطينا مشاكلنا وحليناها ووعدنا بعض أن كل واحد فينا يخلي التاني مبسوط بيه، وحياتنا الخاصة لينا احنا بس".

يذكر أن شيرين عبد الوهاب غادرت المستشفى الذي كانت تتلقى فيه العلاج الفترة الماضية.

وكان المستشار ياسر قنطوش محامي شيرين عبد الوهاب أصدر بيانا بعد خروجها من المستشفى قال فيه: "الحمد لله خروج الفنانة شيرين عبد الوهاب بالسلامة من المستشفى وهى بصحة جيدة وتشكر جميع جمهورها وكل من ساندها في أزماتها وستتحدث في فيديو خلال ساعات"، وذلك بعدما استغاثت به موكلته في تسجيل صوتي، لإخراجها من المستشفى.

وقالت شيرين في التسجيل إنها أصبحت بصحة جيدة بعد مرور 20 يومًا على تلقيها للعلاج في المستشفى.