علقت الفنانة عبير الشرقاوي على انسحاب المؤلف محمد الغيطي من برنامج "القاهرة اليوم" بعد مداخلة هاتفية لها للحديث عن انتقادها لمسلسل "الضاحك الباكي".

ووصفت عبير الشرقاوي ما فعله محمد الغيطي بالهروب وقالت في مداخلة هاتفية جديدة مع برنامج "القاهرة اليوم" من تقديم حسام المراغي ونانسي مجدي: محمد الغيطي هرب من النقد لأنه عارف أنه ككاتب أقل من ضعيف، مسلسلاته السابقة منعرفش عنها حاجة وتشهد عليه بذلك واللي عمله لعب عيال.

وأكدت عبير الشرقاوي أنها لم تسب صناع العمل كما قال محمد الغيطي ولم تكتب لفظ "رمم" وقالت: أنا مقولتش الكلام دا ومش عارفة جايبه منين، أنا قولت الكلام اللي 95% من اللي أتفرجوا على المسلسل قالوه، قولت أن مينفعش امرأة سبعينية مدام فردوس عبد الحميد تطلع أم لطفل رضيع أنت صدمتني يا أستاذ يا مخرج العمل ضربتني بالقلم على وشي وأدتني صدمة خلتني معرفش أتعايش مع الأحداث، ممكن أكون كتبت تعليق ومسحته لكن مقولتش فيه كلمة "رمم"، أنا كنت برد على المتابعين، ومحمد الغيطي بيتبلى عليا.

نرشح لك: عقد قران طارق صبري وشيري عادل

وعن دفاع الفنانة فردوس عبد الحميد وطلبها أن يسامح الجمهور في حلقة قالت: مدام فردوس الحلقة الأولى والثانية طالعة عندها 18 سنة أم لطفل رضيع، وبعد الحلقتين بيبقى سنها 35 سنة ونجيب الريحاني عمره من 18 إلى 20 سنة ودا كلام مش مقنع كان لازم كل مرحلة ليها ممثل مختلف، أنا جامعة أمريكية وقسم مسرح وتخصص تمثيل لكن حتى كمتفرج عادي أنت فصلتني عن الأحداث، وكل الأعمال التركية واللبنانية كل 10 سنين بيجيبوا ممثلة مختلفة.

وردت عبير الشرقاوي على ما قاله محمد الغيطي عنها وعن والدها المخرج الراحل جلال الشرقاوي أنه تبرأ منها وقالت: الكلام دا لا أساس له من الصحة هو كان بيقول كلام كدب كتير، أنا عايشة مع أبويا حتى توفاة الله في فبراير الماضي ولما توفى أنا عايشة مع أمي في شقة أبويا، منين هيتبرأ مني ومنين هبقى عايشة معاه.

حمل آبلكيشن FilFan ... و(عيش وسط النجوم)

جوجل بلاي| https://bit.ly/36husBt

آب ستور|https://apple.co/3sZI7oJ

هواوي آب جاليري| https://bit.ly/3LRWFz5