شريف عامر ردا على نقيب الإعلاميين: أنا ربيت عيالي ومستعد أقعد في البيت خلاص

نهال ناصر

نهال ناصر تاريخ النشر: الجمعة، 4 مارس، 2022 | آخر تحديث:

شريف عامر

عقب الإعلامي شريف عامر على قرار استدعائه من قبل نقابة الإعلاميين لمخالفته ميثاق الشرف الإعلامي، لما تضمنه حواره مع الدكتور مبروك عطية ببرنامجه "يحدث في مصر".

كان ذلك خلال حلقة الخميس من برنامجه "يحدث في مصر" الذي يعرض عبر قناة mbc مصر.

نرشح لك: بعد مرور 38 عاما... ليزا بطلة "هند والدكتور نعمان": مش مصدقة أن الناس فكراني

في البداية وجه شريف عامر اعتذاره للجمهور لأن مقدمة البرنامج ستكون حول مشكلته الأخيرة، موجها كلامه لنقيب الإعلاميين قائلا: أنا راجل ربيت عيالي خلاص وعلمتهم وممكن أقعد في البيت ومعنديش أي مشكلة.

وعلق شريف عامر على أزمة حلقته مع الدكتور مبروك عطية وقال: بقالي 30 سنة بشتغل في الشغلانة دي، وفي آخر 4 أشهر اسمي بقى الخبر وعمري ما سعيت لذلك، وأنا أدعى لنفسي أن رصيدما بيني وحضراتكم يسمح لي إني يبقى ليا شوية مصداقية كويسين عندكم.

وتابع: أنا تعلمت صحافة على يد أساتذة وكنت اسمع صوت فتحي غانم يتكلم عن القضايا الصحفية ولما كبرت كنت أناقش الأستاذ محمد حسنين هيكل عن الصحافة في مرحلة صعبة جدا من تاريخنا، علشان كده معلش أنا راجل بأمشي مفرود ومستقيم الضهر ومرفوع الرأس.

وهاجم شريف عامر نقيب الإعلاميين طارق، قائلا: أنا بطلب من الأستاذ طارق سعدة إذا كنا إحنا بنتكلم عن المهنة إن إحنا نمارس اللي بنطلبه من الناس يعني لجنة تأسيس لنقابة الإعلاميين لازم أنها لما تطلب من الناس عدم الاجتزاء أو أنها تتعامل مع السياق ميصحش أنها تكتب بيان وفي البيان تحط فيديو، وبالمناسبة عرض الفيديو ده في القوانين المحلية وقوانين الدولة غلط لأنك لا تملك هذا الفيديو ولا هذه الصور ومش أنت صاحب القدرة على إذاعتها.

وأضاف: اذا كنا بنتكلم عن المهنة يبقى الاجتزاء جريمة وإحنا بنطلب دايما من الناس إنهم مايعملوش اجتزاء لكلامنا وقلنا كتير إن مصر كلها والمجتمع المصري في السنين اللي فاتت كانت بتعاني من ناس برة مصر يجتزئون كل تصريح بيتقال وبيخرجوه من سياقه، فلما نطلب من حد أنه يلتزم المهنية لا نمارس إحنا الجريمة، والجريمة هي الاجتزاء.

وأكمل: المرصد شاف 3 دقائق و55 ثانية ومقدرش يشوف 4 دقائق و30 ثانية وبلاش يشوف الـ24 دقيقة، الحوار كاملا يعني لكن كان شاف 5 دقائق مثلا وكان ممكن إذا كان هناك الرصد الدقيق للسياق أنه يتعرض كاملا ولا يتم اجتزاؤه، وإذا كان زي البيان اللي ظهر بإن حضرتك هتتقدم ببلاغات للنيابة فأنا بس أرجوك أنه مايتمش الاجتزاء وأنك تعرض الفيديو كاملا ومايتمش الاجتزاء ورمي الناس بالباطل.

وأضاف شريف عامر: كل اللي بطلبه بس رجاء أن حضرتك لما تقدم أي نوع من اللي سميته غيض من فيض وأنا فعلا يعني برضه الحمد لله، قعدت بشتغل صحفي كتير فأعرف أكتب صياغة كويسة وكان ممكن اكتب لحضرتك صياغة أحسن من كده حقيقي لأنه لما تقدم هذا الغيض من فيض وتقول إنه شريف عامر بيهين الشعب المصري يبقى أنت راجل غلطان وأنا عمري ما كنت اتصور إني أكلم حد بهذا الشكل على الهواء مباشرة، أنا راجل ربيت عيالي خلاص وعلمتهم وممكن أقعد في البيت ومعنديش أي مشكلة ولكن أقدر أرد وأدافع عن شرفي المهني وفاهم كويس قوي يعني إيه لغاية دلوقتي النزاهة المهنية.

وأصدرت نقابة الإعلاميين برئاسة طارق سعدة قرارا باستدعاء شريف عامر مقدم البرامج "يحدث في مصر" على شاشة "Mbc مصر"، لمخالفته ميثاق الشرف الإعلامي.

وجاء في بيان من النقابة عبر صفحتها الرسمية بموقع Facebook أن شريف عامر خالف ميثاق الشرف الإعلامي ومدونة السلوك المهني واستمراره في ارتكاب المخالفات المهنية، إما بالإتفاق مع ضيوفه أو السماح لهم بالكذب والتضليل والإهانه للشعب المصري، وذلك كما حدث مع الدكتور مبروك عطية الذي نطق بما لا يعي بالمخالفة للحقيقة والواقع.

لا يفوتك: شكوكو - كيف أغضب الأسرة المالكة حتى أجبروه على بيع سيارته "البينتلي"؟ وعروسته الخشب ناضلت ضد الإنجليز