ضجت مواقع التواصل الاجتماعي مساء أمس الجمعة 21 أغسطس بالتعاطف مع الكابتن مؤمن زكريا نجم النادي الأهلي، عقب انتشار مقطع فيديو وهو يبكي على المسرح متأثرًا بهتاف الجمهور باسمه وتوجيه التحية له، أثناء عرض مسرحية "علاء الدين" للفنان أحمد عز.
علق المخرج مجدي الهواري اليوم عبر حسابه على Instagram، على ما حدث أمس قائلا: "أولا.. عن الإنسانية، الحقيقة أنا متفائل لأن الناس لسه عندها استعداد تتحمس وتشارك وتتفاعل في أي حاجة فيها فعل وعمل إنساني، بس مستغرب أن بعض الناس شايفة الموضوع جديد على الفن، لا خالص! يا جماعة ده هو ده دور الفن.. لأنه ببساطة هو الحياة والحياة من غير الإنسانية مش حياة.. يا ريت نتذكر أن رسالة الفن مش بسيطة وسهلة زي ما بعض الناس فاكرة لا دي ضرورية ومهمة جدا لأنها باختصار واجبة الحدوث، وبتحرك قلوب، ومسئولة عن إسعاد الناس وتقديرهم.. والحمد لله أهو كان مبسوط امبارح وسعيد بالعرض وتكريمه يبقى كده جون لينا الحمد لله، يعني بعد موقف امبارح اللي هو واجب علينا للنجم مؤمن زكريا لما اتحاد الكورة يقرر يعمل ممر شرفي له في مبارك القمة النهارده بعد اللي حصل امبارح؟ كده إحنا عملنا دورنا .. ده دور الفن ياجماعة بس اللي يفهم".
تابع مخرج مسرحية "علاء الدين": "ثانيا.. الحراق مؤمن زكريا، حبيب القلوب، والله ده أقل حاجة نقدره بيها، قلوبنا معاه كانت بتتقطع امبارح عليه، ربنا يشفيه ويرجعه تاني يمتع جمهوره وكلنا ندعيله، كل فرقة علاء الدين امبارح كانت بتعمل دورها في المجتمع برسالة حب من الفن المصري إلى الإنسانية.. اطمنت إننا لسه عايشين والله يا جماعة لما الناس قامت تسقف ربع ساعة علشان بتقدر مؤمن زكريا وقلوبها معاه حاجة جميلة من جمهور واعي مثقف محب للفن ويقدر الاخر الفنان تحياتي له".
اختتم مجدي الهواري: "وتحياتي لكل أعضاء فرقة علاء الدين اطمنت على قلوبكم كل فرقة علاء الدين لما بكيتم اتقطعت قلوبنا.. الحمدلله علي نعمة الإحساس، شكراً فرقة علاء الدين ربنا يجعل ديماً قيمة الانسانية في قلوبكم وتكونوا ديما سفراء الفن المصري، ثالثا :وشكرًا للنجم أحمد زاهر حضوره والكلام الحلو اللي قاله عن العرض، تحية منا وحب واحترام وتقدير منا".
ويُعاني مؤمن زكريا من مرض في الجهاز العصبي أدى لابتعاده عن الملاعب، وبدأ رحلة علاجية في الولايات المتحدة الأمريكية.
مسرحية "علاء الدين" إخراج مجدي الهواري وبطولة النجم أحمد عز، ويشاركه البطولة تارا عماد (ياسمين) ومحمد ثروت (الجني)، وهشام إسماعيل (الوزير جعفر) وسامي مغاوري (السلطان)، كريم عفيفي (قفة)، محمد جمعة (فرعون).
اقرأ أيضًا:
تفاصيل ومعلومات- فيلم "جريمة على ضفاف النيل" عن رواية أجاثا كريستي.. تم تصويره في مصر والبطلة إسرائيلية
بالفيديو- رقص يسرا وإلهام شاهين وهالة صدقي على "بنت الجيران"