شاركت الإعلامية دعاء فاروق عبر حسابها الخاص على Instagram، قصتها مع الفنانة إسعاد يونس والتي بدأت منذ سنوات.
نشرت فاروق صورًا لها هي وابنتها وشقيقتها مع إسعاد يونس وعلقت عليها قائلة: "طيب الست القمر دي قصتي معاها قصة، أنا قبل ما أتحجب كنت قصة شعري زيها كده أسود كاريه وعيني سودة وواسعة زيها كده وعمري ما كنت رفيعة كنت موظوظة زيها كده".
تابعت: " ويقال إن دمي خفيف بس أكيد مش في خفة دمها بس هي التوليفة كانت كده، فأول ما اشتغلت مذيعة بقت الناس تقوللي أنتي فيكي كتير من إسعاد يونس، وشوية من أصحابي كانوا شايفيني شبهها جدا وبقوا يدلعوني يقولوا لي يا زغلول".
استطردت دعاء فاروق: " روحت سلمت عليها والحقيقة رحبت بيا بشكل أسعدني وهو مش غريب عليها طبعا إنها تسعدني لأنها واخدة السعادة حصري، بس الحاجة اللي زودت سعادتي سعادة إنها متابعة فيديوهاتي أول ما شافت محمد ابني قالت له تعالى أنت مطلع عين أمك وأنا بتفرج عليها بتقول فيك بلاوي".
أردفت فاروق: " إتعدل أحسن لك مع أمك عشان هجيلك، واتصورت معاه وهي ماسكة إيده وبتقول له هعرف لو تعبتها والله لأوريك ،طبعا محمد ابني على طول بيتخانق معايا إني بشرد له في التلفيزيون بس أنا كماما مش بقدر أصر في قلبي وأسكت ودايما بقوله إتعدل وأنا مشردلكش، إمبارح قال لي أول مرة أتبسط إنك بتشرديلي كده عشان خليتي صاحبة السعادة تعرفني".
أضافت دعاء فاروق: "طبعا بنتي وأختي لما عرفوا جم جري عشان يتصوروا معاها وكنا بنكلم قرايبنا في طنطا ييجوا يتصوروا هم كمان لغاية أما الناس اتلمت عليها وبدأ البودى جاردات يبعدوا الناس عنها عشان متضايقش، ولقيتها بتحميني بإيديها وبتقول لهم لا دعاء ما يتقالهاش تمشي وظهرت في الصورة وهي بتمد إيديها تبعدهم عني، أنا بحبك يا صاحبة السعادة، ربنا يخليكي لينا وتفضلي مصدر سعادة لكل الناس دايما".
يذكر أن دعاء فاروق تقدم برنامجا اجتماعيا بعنوان "اسأل مع دعاء" ويعرض على قناة "النهار".
اقرأ أيضًا:
فيديو- دعاء فاروق عن خلع حلا شيحة وصابرين للحجاب: ربنا يحمينا من شر الفتن
فيديو- دعاء فاروق تحاول إقناع متصل بعدم الانتحار