احتفل المخرج عمرو سلامة، بمرور 20 عامًا على أول عرض لفيلم "السلم والثعبان"، الذي شارك فيه بمشهد واحد، باسترجاع ذكرياته المرتبطة بالفيلم.
نشر عمرو سلامة عبر حسابه الشخصي على Instagram، مشهد من فيلم "السلم والثعبان"، وعلق عليه كاتبًا: "من عشرين سنة بالضبط، بالصدفة البحتة حد شافني في الجامعة أنا وأصحابي وقالنا "شباب تحبوا تعملوا كاستينج؟" ردينا بـ "آه طبعا" وبعدها سألناه: "يعني إيه كاستينج بقى؟" شرحلنا انها اختبار للكاميرا علشان ممكن بعدها نطلع في إعلانات او نمثل في أفلام، فعلا روحنا عملنا الكاستنج".
تابع: "وقتها أنا كنت في أول سنة كلية تجارة، وكل هدفي كأي واحد في كلية تجارة إني أشتغل بعدها في أي مهنة غير التجارة، أكون بحبها بجد، وكان حلمي وقتها أشتغل في الرسوم المتحركة ثلاثية الأبعاد " 3 دي" وكنت بتعلمها لوحدي بالكتب"
استطرد عمرو سلامة: "بعد مفارقات كثيرة وصدف غريبة لقيت نفسي واخد دور أخ أحمد حلمي في فيلم جديد اسمه السلم والثعبان، إخراج طارق العريان اللي كانت أفلامه والفيديو كليبات اللي بيخرجها بتبهرني كشاب، وكاتبه كاتب جديد بيكتب لأول مرة إسمه محمد حفظي، وروحت التصوير وأنا التمثيل مش في دماغي قوي، ورايح أهرج واتفرج، ومتعجب جدًا من اختيارهم ليا".
أكمل: "اللي كان بيبهرني في التصوير مش أي حاجة غير إن كلنا هنا علشان في واحد عنده رؤية وخطة ماحدش قادر يفهمها بشكلها الكبير غيره، كل واحد بيعمل تفصيلته الصغيرة علشان تبقى قطعة صغيرة في لوحة كبيرة محدش فاهمها غيره، وعرفت إن هو ده المخرج".
أضاف عمرو سلامة: "أعتقد بسبب الدور الصغير ده اللي كان تقريبا ١٠ مشاهد، أنا اكتشفت إني ممثل فاشل، وإن الرسوم المتحركة لن ترضيني بشكل كامل، وعرفت إن مهنة المخرج ديه على قد ما هي مسؤولية جبارة ومخيفة إلا إنها مرضية جدا فنيا لأنها كانت بتجمع كل حاجة بحبها في الفن، الصورة والحكي والموسيقى والتمثيل والتصوير والجزء التقني كمان".
اختتم عمرو سلامة: "وعلى قد ما أنا طول عمري مُحرج من شكلي وتمثيلي في الفيلم ده، هفضل مدين للتجربة ديه إنها سبب إني بشتغل شغلانة - حتى لو كانت مهلكة وتقصر العمر- بحبها وعندي ليها شغف، وديه نعمة تسوى كثير".
جدير بالذكر أن فيلم "السلم والثعبان"، الذي طرح للعرض عام 2001، من بطولة هاني سلامة، أحمد حلمي، حلا شيحة، رجاء الجداوي، مها عمار، طارق التلمساني، عادل أمين، ثريا إبراهيم، ومن تأليف محمد حفظي وطارق العريان، إخراج طارق العريان.
اقرأ أيضا
صورة- عمرو سلامة شارك في هذا الفيلم في طفولته دون أن يعلم!
عمرو سلامة ينضم إلى لجنة تصويت جوائز الأوسكار