نعى الشاعر أيمن بهجت قمر، الفنان فاروق الفيشاوي، الذي رحل عن عالمنا اليوم الخميس 25 يوليو.‏

كشف أيمن بهجت قمر، عبر حسابه الشخصي على Facebook، عدد من المواقف التي دعمه فيها فاروق الفيشاوي، سواء فنيًا أو ماديًا، ‏قائلًا: "كان من أكتر الناس اللي أبويا بيحبهم وبيستجدعهم، وكان فعلًا عند حسن ظنه بعد وفاة أبويا لما فضل يسأل عليا وقرر إنه ‏يحيي مسرحية ولاد ريا وسكينة تاني بعد توقفها في حياة أبويا، واتصل هو والمنتج مطيع زايد الله يرحمه وأصروا إني لازم أخد ‏فلوس تاني وبعدها عمري ما انسى لما في يوم كنت ماشي في شوارع إسكندريه ما فيش في جيبي ولا مليم وأنا عندي 16 سنه وبيتت ‏على البحر واستنيت لحد عرض المسرحية ما ابتدى الساعه 9 بالليل تاني يوم، وروحت له المسرح واداني فلوس وبقيت كل يوم على ‏حسه بروح المسرح وأقعد في كواليس مسرحية أبويا".‏

تابع: "وعمري ما انسى لما وقف جنبي هو والأستاذ محمد فوزي وادوني فرصة عمري وأول فرصة في حياتي في الكتابة وأعدت ‏صياغة برضه مسرحية ولاد ريا وسكينة تاني باسم أنا والحكومة، وبقيت مش مصدق نفسي وأنا شايف حواري على لسان فاروق ‏الفيشاوي ومعالي زايد الاتنين اللي شاركوا في تربيتي".‏

استطرد أيمن بهجت قمر: "عمري ما انسى إيمانه بيا وقتها في 1997 لدرجة إنه جاب لي سيناريو فيلم كان بيصوره وخلاني أعدت ‏صياغة مشهدين من أول وجديد ودول كانوا أول مشهدين أشوفهم ليا في حياتي على شاشة السينما وكان أول فنان ينطق الكلام اللي ‏أنا كاتبه وأشوف بداية أحلامي على إيديه".‏

واصل: "عمري ما انسى إنه أول واحد جابني أكتب أغنيه في فيلم وكانت "إحنا بتوع المطار" يعني كمان أول ممثل يغني لي! هنسى ‏إيه ولا إيه".

اختتم أيمن بهجت قمر: "من الأخر فاروق الفيشاوي كان حاجه كبيرة أوي بالنسبالي برغم إن يمكن ماكناش بنتقابل بقالنا سنين بس ‏القدر برضه خلاني أقابله في عزا الأستاذ يوسف شريف رزق الله من أسبوعين وكأنه كان لازم بعد العمر ده وبأي شكل أقابله ولو ‏لمرة، عشان أقف وأتكلم معاه وأحكيله عن ولادي ويهزر معايا وأودعه، فيه ناس كده المحبة بتشدك ليهم في أخر لحظة عشان لازم ‏لازم تودعهم، سلام يا أجدع واحد قابلته في حياتي وسلم لي على أبويا، الفاتحة".‏

شيعت جنازة الراحل فاروق الفيشاوي عقب صلاة ظهر اليوم من مسجد مصطفى محمود بالمهندسين، وحضرها عدد كبير من نجوم الفن.

النجوم في جنازة فاروق الفيشاوي

وتقرر أن يقام العزاء الخاص بالفنان فاروق الفيشاوي مساء الأحد المقبل الموافق 28 يوليو في مسجد الشرطة بمنطقة الشيخ زايد في 6 أكتوبر.

تعرف على موعد عزاء فاروق الفيشاوي

اقرأ أيضا:

صدمة وانهيار النجمات في جنازة فاروق الفيشاوي

شهيرة تكشف اللحظات الأخيرة في حياة فاروق الفيشاوي