تذكرت الممثلة سارة عبد الرحمن مع خيار Memories أو "ذكريات" الذي يوفره موقع Facebook، محنة مرض والدها وتعرضه لبتر في ساقه اليسرى.

وكتبت سارة: "زي الوقت دة السنة اللي فاتت.. كان من أهم فترات حياتي.. الصور دي بالذات طنط هالة صورتها في يوم مهم. قاعدة على سرير بابا في غرفة ٦٢٤ في المستشفى باوثق اللحظة لحد ما يطلع من العمليات".

وتابعت: "معاناة بابا مع المرض ماكانتش بس مع السرطان، و نقل الدم المستمر، و العظام اللي بتتكسر واحدة ورا التانية.. بس السكر كمان قرر يعملها معانا و أثر على رجله و سرعان ما الموضوع قلب لقرار لحظي لازم يتاخد لإجراء عملية بتر عالية الخطورة.. ممكن اخوض اكتر في تفاصيل الخضة اللي كلنا كنا فيها، او الانهيارات اللي كانت بتحصل من حبايبه او حالة الانتظار المرعبة اللي كنا فيها .. او شجاعته في تلقي الكلام لما عرف انه مضطر يمضي على اقرار عالي الخطورة و احتمال مايطلعش و انه لو طلع من العملية، هايطلع ناقص طرف.".

وأضافت: "بس انا النهاردة ممتنة لحاجة مهمة اوي بابا علمهالي في الموقف دة.. و هي الرضا بالنتيجة اللي ربنا قسمهالنا. احنا كنا بين كابوسين.. كابوس المجازفة بحياته في العملية دي، و كابوس البتر ذات نفسه. يومها عرفت يعني ايه تقبل.. انا مش عايزة بابا يتعذب اكتر من كدة ف راضية لو ماكملش.. و نفسي يفضل وسطينا و اكيد هاكون راضية لو كمل و هانكون معاه في الرحلة الجديدة... ماكنتش اتمنى ان بابا يتحط في موقف زي دة عشان انا اتعلم الحاجة دي.. بس يمكن ايجاد الايجابيات طريقة بنهون بيها على نفسنا الحاجات اللي مابتعديش بسهولة دي".

واستكملت: "بابا طلع اسرع من ما كنا متوقعين.. و عرفت يومها ان ربنا قاسملنا نكون مع بعض شوية كمان.. ليلتها انا كان ليا الشرف ان انا اللي ابات مع بابا.. و اكون معاه في اول الساعات في حياته من غير قدمه الشمال.. اه انا بتطاردني كوابيس و فلاشات من الايام الصعبة اللي شوفناها طوال رحلة ال ٨ سنين مع المرض.. بس الدروس اللي اتعلمتها دي هي اللي مخلياني قادرة اكمل... شكرا رقم ٣٩٨٧ تقريبا.. محتاجة اقول وحشتني؟ اظن معروفة".

يذكر أن سارة اشتهرت بدورها في مسلسل "سابع جار"، من تأليف هبة يسري، التي تشارك في الإخراج مع أيتن أمين ونادين خان، ومن بطولة دلال عبد العزيز وشيرين وهاني عادل ورحمة حسن وأسامة عباس وهيدي كرم وسارة عبد الرحمن ومحمد علاء ودعاء حجازي وصفاء جلال وأحمد داش، وإنتاج The Producers.

اقرأ أيضا

بالصور- فستان سارة عبد الرحمن في ختام القاهرة السينمائي مستعمل من وكالة البلح