خاص أمير المصري لـ"في الفن": اعتذرت عن مسلسل أجنبي من أجل "مليحة" وخسرت دور بسبب دعمي لـ غزة

أحمد حتحوت | فى حياة المشاهير

أمير المصري يكشف لـ (في الفن) تفاصيل استبعاده من مسلسل بسبب دعمه للقضية الفلسطينية وعن اعتذاره عن عمل من أجل مليحة

الاثنين , 8 أبريل 2024 - 23:04 | اخر تحديث: الثلاثاء , 9 أبريل 2024 - 14:04

منذ أن بدأت ضربات الاحتلال على غزة في أكتوبر الماضي، لم يتوقف الفنان أمير المصري عن نشر الوعي عن الوضع المأسوي في القطاع ومعاناة الشعب الفلسطيني والمطالبة بوقف إطلاق النار. ولم يقتصر دعم الممثل للقضية الفلسطينية على منشورات السوشيال ميديا، بل هو يشارك في بطولة "مليحة" الذي بدأ عرضه في النصف الثاني من رمضان.

تواصل FilFan.com مع أمير المصري للحديث عن مسلسل "مليحة" وأعماله العالمية وما تعرض له من استبعاد بسبب دعمه لفلسطين.

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

يتسائل البعض عما إذ كانت كتابة مسلسل "مليحة" متعلقة بالهجمات الحالية على غزة أم أنه مخطط له من قبل، ويقول أمير: "أنا الصراحة مش عارف .. لو صدفة فهي صدفة لذيذة جدا، وكدة كدة الموضوع موجود بقاله 75 سنة فاحنا أوريدي بنفكر في غزة وفلسطين، و بحس أي حاجة بتحكي عن القضية بتبقى إضافة إيجابية، طبعا بتبقى مجازفة لو العمل مش كويس، بس هو سمع برضه برا، وإسرائيل متعصبة منه، وأي حاجة بتعصبهم أكتر بتبقى حاجة كويسة".

مسلسل مليحة

وأضاف أمير أن تصوير المسلسل بدأ في شهر فبراير الماضي، وأوضح: "كنا شغالين على السكريبت طول الوقت واحنا بنصور عشان منعملش حاجة غلط، والكاتبة رشا الجزار كانت دايما بتغير في الورق".

وعبر أمير المصري عن قلقه من ردود الأفعال قبل بدء عرض المسلسل، إذ قال: "طبعا كنت قلقان من ردود أفعال، هل متقبلين يتفرجوا والأحداث لسة شغالة؟ بس بالعكس حسيت العمل كان إضافة ليهم".

يلعب أمير المصري شخصية "علي"، طبيب أسنان تربطه علاقة غرامية بـ "فريدة" (مروة أنور)، ويكشف أنهما استعانا بعلاقة سينمائية شهيرة تحضيرا للمسلسل: أنا في الحقيقة ألطف من "علي" ومش رخم كدة مع البنات، لكن احنا استخدمنا "تيمور وشفيقة" كمرجع لينا في العلاقة".

علي وفريدة في مليحة

وعن تفاصيل العمل مع ميرفت أمين، قال أمير: "هي عسل وكانت إضافة كبيرة وكنا محظوظين إنها وافقت تشتغل، هي ممثلة أيقونية وبيبان كدة من قبل ما يقولوا أكشن، روحها هادية وطيبة بس أنا محظوظ أنها بتلعب أمي، أنا كان حوليا ممثلين جامدين جدا، أستاذة ميرفت أمين وحنان سليمان، أنا اتأثرت وكنت بعيط في الكواليس لما اتصابت بالسرطان، اتأثرت جامد، وكمان دياب قد المسئولية بجد، أول دور بطولة له ونجح في دوره، وصعب إنه يلعب شخصيتين: واحد في البيت والمقدم اللي بيحمي بلده، يعني مينفعش يهزر معاهم زي ما بيضحك معايا".

إلى جانب طب الأسنان، يعمل أيضًا "علي" كمدرس أطفال لتحسين معيشته، ويقول أنه لو اختار وظيفة لفضل التدريس، إذ قال: "أحس تعليم أطفال بيحسسك بالنجاح أكتر لما بتشوف الطالب بيتطور أو بيتحسن، بيكون في اتصال انساني أكتر مع الأطفال لو أول مرة يتعلموا حاجة، لكن دكتور السنان بحسه وحيد قوي لأنه بيبص على سنان كل يوم".

وحكى أمير المصري لنا عن دعمه المستمر للقضية الفلسطينية وما واجهه من عواقب بسببه في حياته المهنية، كاشفا: "أنا خسرت دور في مسلسل بسبب دعمي لغزة، بس مش متضايق خالص، أي حد عنده منصة لازم ياخد موقف، مينفعش يسكت، كل الحاجات دي بتتحسب، مقدرتش أكمل وأنا بشوف ناس بتموت، انت بتكتشف حاجات عن نفسك والناس اللي حواليك لو انت صاحب قضية".

أمير المصري يطالب بوقف إطلاق النار أثناء تقديمه لجائزة بافتا 2023

وعن تفاصيل المسلسل الذي تم استبعاد أمير عنه، قال: "كان مسلسل أمريكي مع الفنان كولين فيرث بس الحمد لله مكانش نصيب ليا".

لم يكشف أمير المصري عن اسم العمل الذي خسره ولكن من المعروف أن كولين فيرث يحضر لمسلسل Lockerbie، الذي يدور حول حادث إرهابي في سكتلندا.

وأضاف أمير عن تجربة فصله من المسلسل: " مش بيقولوها بطريقة واضحة قوي، مثلا انت خلاص بتتفق معاهم على حاجة وبيقولوك موعد التصوير وكل حاجة وبعد وقت قليل بيقولوك إنهم اختاروا واحد تاني ودة كان في أكتوبر، ودي عمرها ما بتحصل لما تكون ماضي عقد، أنا لما كلمت مدير أعمالي سألته تفتكر دي علاقة بالفيديو اللي أنا نزلته؟، قالي احتمال كبير بس خليني أتأكد، فرجعلي تاني قالي ممكن تخلي بالك لأن الدنيا حساسة شوية والناس مش فاهمين . قالي بص إحنا طبعا كلنا متضايقين من اللي بيحصل بس في ناس فاكرين إنك لو بتعمل كدة يبقى إنت بتدعم خطف الأسرى، بس لا أنا بتكلم عن اللي بيموتوا في غزة، بس بص اللي بنتعلمه دلوقتي بتمن، هيبقى ببلاش بكرة، بس كل حاجة نصيب."

أمير المصري

ولكن تلك العواقب لم توقف أمير المصري عن دعم اغزة، إذ شارك في مزاد "سينما من أجل غزة" مع مجموعة من نجوم هوليوود وأوروبا، متبرعا بمعطف ارتداه في فيلم Limbo، وشاركه في التبرع كل من ميليسا باريرا، بول ميسكال، جوناثان جليزر، أوليفيا كولمان، سبايك لي، رامي يوسف، وحصد أكثر من 100 ألف جنيه استرليني في أقل من 4 أيام.

فيلم Limbo

ينتظر أمير المصري حاليا عرض المسلسل البريطاني Wolf Hall: The Mirror and The Light، الذي يجسد فيه دور الشاعر البريطاني توماس ويات، ويدور العمل حول حياة رئيس الوزراء توماس كرومويل، ويجسده الفنان القدير مارك رايلانس.

وقال أمير المصري: "أنا كنت واثق في المخرج لأنني اشتغلت معاه في The State، وأنا محظوظ إنني هلعب شخصية معروفة في التاريخ زي محمد الفايد، ومارك رايلنس بعتلي كتاب أقراه عن علاقة توماس ويات بتوماس كرومويل ودة خط درامي مهم ليا"

مسلسل The State

وكشف أمير عن تجسيده لشخصية غير عربية: "طبعا أنا لما يجيلي فرص ألعب واحد غير مصري، في الوسط دي رسالة إن هما شايفينك تقدر تبقى مقنع في الدور دة، ان إنت تبعهم، انت زيهم وتقدر تلعب واحد أوروبي من بريطانيا من منطقة شعبية هناك أو واحد من طبقى عالية، واحد ملكي، طبعا بيبقوا واثقين في تمثيلك أكتر من شكلك".

ويذكر أن أمير المصري لعب مدرس رقص في الفيلم النمساوي Club Zero، وكشف أن المخرجة اختارته بعد مشاهدتها لـ Limbo، ولكن تم حذف الكثير من مشاهده بسبب "تركيز الفيلم على الإثارة والظلام وإصابة الطلاب بفقدان الشهية"، وأضاف أن المشاهد كانت مقززة لدرجة تخبئة وجهه أثناء مشاهدة الفيلم بمهرجان كان.

رقص أمير المصري في فيلم Club Zero

كما ينتظر أمير المصري عرض فيلم In Camera، الذي كان من المقرر عرضه في مهرجان القاهرة السينمائي قبل إلغاء دورته 45، ويقول أن الفيلم يناقش صراع الأقليات من أجل النجاح في الوسط الفني الغربي، وقال " للأسف في ناس بيفكروا بمنطق : أنا لو هنجح هبقى الوحيد اللي من أصل عربي . الناس الوحيدة اللي مش بيفكروا كدة، اليهود، بيساعدوا بعض، لو نزلت نيو يورك هتلاقيهم بيساعدوا بعض ويشتروا من بعض. عشان كدة هما من أغنى الناس في العالم، لكن في التمثيل وفي تنافس عالي يعني. بس بدأ يقل الأسلوب دة وفي دعم أعلى والناس بتساعد وبترشح بعض لادوار، أنا كدة مع صحابي، لو لقيت حاجة تبقى مفيدة لحد تاني، برشحه. من أقرب أصدقائي في بريطانيا، ظافر عابدين، وعلي سليمان الفلسطيني اشتغلت معاه أكتر من مرة، وخالد عبد الله صاحبي وكنا هنلعب أخوات على المسرح بس احنا الاتنين اعتذرنا في آخر لحظة عشان جالنا مسلسلات بس كنت محظوظ انا اشتغلنا مع بعض في The Crown، وهو زي الأخ الكبير، كان بييجي اللوكيشن يتفرج وأنا بصور مشاهدي".

أمير المصري

إلى جانب In Camera، هناك فيلم آخر كان من المقرر عرضه في مصر قبل تأجيله بسبب أحداث غزة، وهو See It Say It، وقال عنه: " كان هيتعرض في الجونة بس اضطرينا نأجله لأنه كان في وقت صعب شوية، فقولنا خلينا نستنى شوية".

See It Say It

ورغم كثرة الأعمال السنوية التي يشارك فيها أمير المصري، إلا أنه يحرص على عدم تعارضهم، إذ قال "مش بحب أزحم نفسي في التوقيت وبحب أركز في حاجة واحدة في وقت واحد، ساعات بشتغل على حاجتين في وقت واحد، ودة كان هيحصل مع مليحة، واتعرض عليا مسلسلين أجنبيين منهم واحد من انتاج Apple بس اعتذرت عشان أركز مع "مليحة"، كنت بحاول لحد آخر لحظة أخلي الاتنين مع بعض بس حسيت لو عملت كدة، هعرض مليحة لمجازفة وانا مش عايز أؤثر على شغل ناس تانيين اللي عندهم ضغط ينزلوا مشاهد قبل رمضان".

شخصية علي في مليحة

يعرض مسلسل "مليحة" على منصة Watch It وهو من إخراج عمرو عرفة وتأليف رشا الجزار ومن بطولة دياب، ميرفت أمين، أمير المصري، سيرين خاس، أشرف زكي، حنان سليمان ومروة أنور.

اقرأ أيضا:

هنا الزاهد تكشف كيف أمضت أول رمضان بعد طلاقها من أحمد فهمي

ياسمين عبد العزيز تستمع لأغنية "كدابين" لشيرين عبد الوهاب … هل قصدت الرد على أحمد العوضي؟

كريم محمود عبد العزيز يتحدث عن بناته وكيف تغيرت اختياراته الفنية بسببهن

مسلسل "المداح أسطورة العودة" الحلقة الأخيرة - موت الشيخ صابر بعد وصوله إلى سيف جده

لا يفوتك: نيقولا معوض يتحدث لـ في الفن عن مسلسل الحشاشين ودور عمر الخيام واستخدام العامية المصرية

حمل آبلكيشن FilFan ... و(عيش وسط النجوم)

جوجل بلاي| https://bit.ly/36husBt

آب ستور|https://apple.co/3sZI7oJ

هواوي آب جاليري| https://bit.ly/3LRWFz5