اسمحوا لي أن أوجه رسائل بسيطة هنا لبعض من الفنانين في الوسطين السينمائي والغنائي تعبر عن رأيي فيما قدموه خلال 2007 وما أتمناه لهم في 2008.
أحمد السقا : أثبت فعلاً إنك تقدر تغير جلدك .. دورك في "الجزيرة" أهم علامة في مشوارك .. أرفعلك القبعة يا "فارس السينما".
عمرو دياب : ألبومك اتسرب قبل طرحه ، وكل الدعاية كانت بعد ما نزل السوق ، لكن قدرت بجمهورك إنك تؤكد بجد إن النجم نجم و"هضبة" حتى لو مافيش شركة ولا فلوس ، والفاشل فاشل حتى لو نزل ألبوم وكليب كل يوم.
منى زكي : كفاية بطولات مشتركة .. شيلي فيلم لوحدك عشان إنتِ قدّها إن شاء الله.
رامي صبري : منزلتش حاجة جديدة في 2007 بس أثبت فيها بالحفلات إنك نجم ليه جمهوره اللي بيحبه .. ماتضيعش ده منك.
أحمد حلمي : يا خوفي عليك من الغرور .. لو قدرت تحصّن نفسك منه شوية كمان هتبقى علامة كبيرة ومهمة أوي في تاريخ السينما المصرية.
حاتم فهمي : المزيكا في ألبومك الجديد "صدقيني" جامدة أوي ، بس إوعى تتغرّ .. لسه شوية.
كريم عبد العزيز : دورك في "خارج على القانون" مينفعش حد يعمله غيرك .. أبدعت .. بجد برافو.
سميرة سعيد : غيابك علينا طوّل .. بس أكيد كل تأخيرة وفيها خيرة.
توما : إوعى تنحت يا توما .. 2007 كنت جامد أوي فيها عشان كنت "بتنقي" .. استمر.
حسن الشافعي : عمرو دياب كان "نطرة" كبيرة في حياتك .. بس إوعى تعتمد عليها .. خد وقتك عشان تثبت نفسك أكتر.
محمد يحيى : محتاج تختفي شوية وتركز عشان تغير كل الأشكال اللي قدمتها الفترة اللي فاتت .. إنت تقدر تعمل كده وتفاجئنا بألحان جديدة جامدة .. بس إياك والـ"أنا".
أيمن بهجت قمر : إنت بقيت عمهم .. ما شاء الله عليك.
مي عز الدين : إنتِ حلوة في الشعبي .. بس الناس مش عايزة تشوفك كده كتير.
تامر حسني : أكتر فنان الناس اتكلمت عليه في 2007 سواءً بالحلو أو بالوحش ، وده يدل على ذكاء ودماغ مش بتنام من كتر التفكير ، لكن ده ممكن يضيع بسرعة لو فضلت تدي ودانك لكل "بوء" معدي.
عمرو مصطفى : ممكن تكون غلطان وممكن تكون مظلوم ، بس حاول إنك تركز أكتر على شغلك وإبعد عن المشاكل.
المخرج محمد جمعة : قدمت سينما جديدة بعين مختلفة مع "أحلام حقيقية" ، أياَ كان نوع الفيلم اللي جي .. خليك مختلف.
أحمد فهمي : ركز في التمثيل أوي .. عشان ييجي منك بجد.
يوسف شاهين : كل فيلم ليك بتتكلم بلسان الناس .. "هى فوضى؟" داس على الجرح أوي .. ربنا يلطف بينا.
خالد يوسف : واقعيتك وتفاصيلك أجمل حاجة في أسلوبك .. بس خايفة ييجي يوم وألاقي ستات عريانة بجد في أفلامك!
خالد صالح : كل مرة بتبهرنا بـ"وش" جديد ، عمرنا ما هانشبع منك .. ومستنيين الـ"وش" اللي جي.
الموزع أحمد عادل : مستنية أحسّ بتركيزك في المزيكا وشغلك الجامد الفترة اللي جاية.
هاني يعقوب : إنت "شيك" أوي في مزيكتك .. يا ريت ماتختفيش تاني.
خالد سليم : أغاني ألبومك "غايب عني" دخلتنا في "موود" غنا جديد .. كنت واحشنا فعلاً كمطرب.
الشاعر نادر عبد الله : كل كلامك "بيوجع" ، اسمك على الأغنية بيبان قبل ما نقرآه على غلاف الألبوم .. الله عليك.
الشاعر بهاء الدين محمد : ليه شغلك قليل؟ .. ماتغيبش علينا يا كبير.
نصر محروس : إنت مركز في السينما دلوقتي .. بس ماتطلوش وإرجع للمزيكا .. عشان إنت حد مهم في الصناعة دي.
أحمد الدسوقي : بان فعلاً إنك عايز "تخلق" مزيكا تعيش وتستمر .. مش بتعبي شرايط وخلاص ، الفترة اللي جاية أصعب من اللي فاتت بكتير .. شد حيلك.
عمرو أديب : تأثيرك على الناس مبهر .. ربنا يخليك ليهم بجد.
محمد حماقي : إنت ذوقك عالي أوي في اختياراتك لمزيكتك .. وأتمنى إنك تقدر تقدم في 2008 ألبوم جامد وحفلات "عالمية" زي ما إنت عايز.
بالطبع كانت الأحداث الفنية في 2007 كثيرة ، لكن من الصعب سردها في مقال واحد.
وأشكركم على سعة صدركم وسماحكم لي بمشكاركتكم لـ"رسائلي" ، ويمكنكم تأييدي أو معارضتي من خلال تعليقاتكم على المقال ، وكل عام وأنتم بخير.
بدأ من "الطريق إلى إيلات" وتوقف قلبه 3 مرات وقام بتأليف هذه الأفلام … 10 معلومات عن طارق الأمير "عبد المنصف" في "عسل أسود"
منذ 15 ساعة
15 تصريحا لـ عمرو يوسف في "بحب الإذاعة": عمرو دياب كوميديان عظيم وباخد رأيه في خطواتي الفنية وفخور بنجاح "السلم والثعبان 2"
منذ 17 ساعة
#شرطة_الموضة: عبير صبري بإطلالة cowgirl في جلسة تصوير جديدة
منذ 17 ساعة
حصاد 2025- محمد هنيدي ومحمد فؤاد ورامي إمام وريم مصطفى من بينهم … نجوم احتفلوا بزواج أبنائهم هذا العام
.jpg)
