تامر حسين يهاجم حسن شاكوش: لولا نجاح محمد حماقي ماكنتش اتشهرت

محمد سلطان محمود | فى موسيقى وحفلات

تامر حسين

الثلاثاء , 28 يونيو 2022 - 17:06

عبر الشاعر تامر حسين عن غضبه من اتهامات مؤدي المهرجانات حسن شاكوش لصناع أغنية "حاجة مستخبية" بسرقة اللحن من أغنية تركية.

وكتب تامر حسين عبر حسابه على Facebook: "الحقيقة مُستفز جداً كلام مطرب المهرجانات حسن شاكوش، تصريحاته فى برنامج الأستاذ عمرو أديب غير موفقه تماماً من الناحية الأدبية وذوقيات المهنة والجهل بالمعلومة والتدليس اللى بيعمله للمُشاهِد اللى مايعرفش حقيقة لحن بنت الجيران اللى مِن ألحان ملحن شاب مصرى (مدين )".

وأوضح: "الراجل تم التعاقد معاه، رسمياً من شركة فى تركيا بمقابل مالي نظير استخدام لحن حاجة مِستخبية، اللى خلالك شأن وشهرك وكان سبب رزق ليك، عيب تنكر الحقيقة وتضلل الجمهور اللى يجهل بالمعلومة، الراجل ماسرقش لحن حاجه مستخبيه ده من إبداعه".

نرشح لك-حذف مهرجان "بنت الجيران" لحسن شاكوش من "يوتيوب" .. أول رد من صناع "حاجة مستخبية" بعد اتهامات السرقة

وأضاف تامر حسين: " وده تعدي على حقه الأدبى وممكن يقاضيك وياخُد تعويض على إساءتك وجهلك بالمعلومة، ثانياً، شتان الفرق الشاسع بينك وبين نجم كبير زى محمد حماقى فنياً وأدبياً وثقافياً وذوقياً من حيث المحتوى والمضمون، وسيبك من الزمن اللى إحنا فيه وتدني الذوق العام وإعلانات اليوتيوب الممولة اللى خليتك تطلع تقول أغنية محمد حماقى جايبه ١٦ مليون مشاهدة بطريقة سخيفة منك، وكأنك مايكل جاكسون".

وأكد: " هتعدى السنين وهتشوف، اللى حايعيش حاجه مِستخبيه ولا أغنيتك اللى لولا نجاح أغنية محمد حماقى وتوصيلها لأكبر قدر من الجمهور، ما كانتشي أغنيتك اتشهرت ع الجاهز الراجل ساهم فى نجاحها فذوقياً تشكره، وتتكلم بأسلوب أرقى من كده على ناس كانوا سبب فى نجاح ورزق ليك وماحدش جرح فيك، كلهم دعموكم عشان تاكلوا عيش وتنجحوا وأهاليكم وحبايبكم يفرحوا بيكم والراجل أقدم مِنك وأشهر مِنك يبقى تقدره وتتكلم بشكل منصف".

وتابع تامر حسين: "ثالثاً، صناع الأغنية المبدعين المبتكرين الشاعر المبدع محمد عاطف والملحن المبدع صاحب اللحن الأصلي اللى اتاخد فى تركيا للنشر بمقابل مالي والموزع الكبير أحمد إبراهيم، دول ناس يستحقوا الشكر فى العلن مش تشوية وتقليل من قدر أغنيتهم اللى نجحت جداً في سنة نزولها وكانت أنجح أغانى السنة".

واختتم حديثه قائلا: " أتمنى من الإعلام والسادة المسؤلين عن اختيار الضيف يصدروا للمجتمع حاجات وطاقات حلوة مبهجة مستنيرة وعندها قدر من الوعى والإحترام والتقدير والذوقيات، بلاش إحباط الله يخليكم مش حايبقى كرة وفن حافظوا على ما تبقى".

وعاد تامر حسين ليشيد بالإجراء الذي أتخذه صناع أغنية "حاجة مستخبية" بعد حذف مهرجان "بنت الجيران" من قناة حسن شاكوش عبر يوتيوب، وكتب: " راجل يامدين برافو عليك،ماضاع حق وراءه مطالِب".

وأغنية حاجة مستخبية من كلمات محمد عاطف، ألحان مدين وتوزيع أحمد إبراهيم، وصدرت ضمن ألبوم محمد حماقي "حاجة مستخبية"، وتم تصويرها فيديو كليب لتحقق 116 مليون مشاهدة.