مدحت صالح: أنا ضيف على التمثيل وخالد النبوي عشرة عُمر.. وهذا سر نجاح تتر "راجعين يا هوى"

محمد أحمد | فى حياة المشاهير

مدحت صالح

الأحد , 19 يونيو 2022 - 20:06 | اخر تحديث: الأحد , 19 يونيو 2022 - 21:06

وصف الفنان مدحت صالح أغنية تتر مسلسل "راجعين يا هوى" للفنان خالد النبوي بـ"القرفة الحلوة".

وأضاف خلال مداخلة هاتفية لبرنامج "فن مشكل" الذي يُذاع على "شعبي اف ام": "الأغنية كانت قرفتها حلوة، فهي من كلمات تامر حسين وألحان عزيز الشافعي اللي أعمالهم دايما قريبة من قلوب الناس، وهما ذاكروا حدوتة المسلسل وقدروا يصيغوها في أغنية كويس أوي".

نرشح لك - شروط حصول حسن شاكوش على كارنيه نقابة الموسيقيين: الالتزام بتقاليد المسرح والابتعاد عن الألفاظ المخالفة

وتابع مدحت صالح: "عزيز الشافعي من الملحنين اللي بيريح أي مطرب بيشتغل معا، أما خالد النبوي عشرة عمر وصديقي واشتغلنا مع بعض زمان في فيلم (إحنا ولاد النهاردة)، فهو من النجوم اللي بتقدم فكرة تفيد الناس ومواضيع مميزة".

وعن مدحت صالح كممثل قال: "بحس إنى ضيف على زمايلي وحبايبي وأصدقائي فى التمثيل، وبرتاح أكتر لما بحس إن شغلتي الأساسية هى الغناء".

واستكمل: "أغنية (مبحبش حد يصيحيني) ليها قصة وهى إني كنت قاعد مع أصدقاء دراسة ولينا ذكريات مذاكرة مع بعض وكانت أهم حاجة وقتها النوم.. فلما عمرو الشاذلي الملحن بعتهالي هو ومحمد شفيق الموزع والمؤلف إيهاب عبد العظيم حسيت كأنهم كانوا سامعين إحنا بنرغي فى إيه والأغنية دمها خفيف وحبينا نرسم الابتسامة لولادنا عشان الارتباك والتوتر في الامتحانات".

واختتم تصريحاته قائلا: "الفترة الجاية إن شاء الله هتنزل أغنيات تباعا كل أسبوعين، ودلوقتي بستعد لحفلات الصيف.. عندي حفلة في مكتبة الإسكندرية أغسطس المقبل".