كريم سرور يروي تجربة مرضه: محدش سأل عني

إيمان مندور | فى حياة المشاهير

كريم سرور

الاثنين , 17 أغسطس 2020 - 14:08 | اخر تحديث: الاثنين , 17 أغسطس 2020 - 14:08

كشف الفنان كريم سرور عن تعرضه لوعكة صحية شديدة، خلال الأيام الماضية، حتى إنه لم يستطع الحركة أو النهوض من مكانه.

وعاتب كريم الكثيرين على عدم سؤالهم عنه، رغم مروره بهذه الحالة الصحية الصعبة، كاتبا عبر حسابه على Facebook: "أنا كدة بقالى ٤ أيام حرفيا مش قادر اتحرك ولو روحت الحمام دى تبقى معجزة من عند ربنا وموارب باب الشقة عشان الديليفرى بتاع الصيدلية أو المطعم لما ييجى يدخل علطول عشان مش هقدر بجد أقوم افتح الباب".

تابع: "المهم إني نزلت ستورى لعلاجى الكتير والحقن اللى باخدها وكتبت إنى تعبان جداً ومعظم أصحابى عارفين إنى عايش لوحدى.. الكوميديا كلها بقى إنه جالى ٣ مكالمات بالظبط من ناس هما اه أصحابى طبعاً لكن مش قريبين وبنتقابل كل فترة كبيرة.. وكام مسدج كدة من نوعية مالك يابنى فيه ايه ومش هنحسب الريبلايز بتاعة الستورى عشان ده هنعتبره مجرد كومنت كده وأنا مش هحسب الكومنتات إنها اهتمام أكيد".

أضاف كريم: "طب ليه أنا بكتب الكلام ده .. لإنى فاكر كويس إن فيه فترات كنت شغال كتير ومنتشر والناس ساعتها كلها كانوا مهتمين أوى بيا .. فخر الشلة بقى ومع الوقت بتحصل تموجات وعلو وهبوط.. اللى مضايقنى جداً جداً إن من ضمن ٣٤٠٠ شخص شافوا الاستورى يجيلى ٣ مكالمات ومش ناس قريبة أصلاً.. اللى هو فكرة إن حتى القريبين منك هيحبوك على أساس نشاطك الحالى مش لشخصك".

أشار كريم إلى أنه يمر بهذه الحالة كثيرا بسبب تقرحات فى المعدة، تؤدي لآلام شديدة، مضيفا: "أنا بقول الكلام ده وأنا صاحى بقالى ساعتين بحاول أقوم ادخل المطبخ اسخن شوربة الخضار وأجيب مياه عشان العلاج ومش قادر وحرارتى مرتفعة بشكل كبير فالموضوع اشبه بالتخريف .. بس حسيت انى معنديش قدرة على المقاومة فعلاً وحبيت افضفض شوية .. لو نكدت عليكم حقكم عليا ولو مش فارق معاكم ف ده كان شيئ متوقع من الاول.. وأنا بالكتير بكره أو بعده هكون كويس جداً وهستعيد نشاطى وحيويتى بكل سهولة".