رسائل إلى أهل الفن: أجمد ما في 2008، وتفاؤلات 2009

ياسمين السماحي في

سميرة سعيد

الأحد , 28 ديسمبر 2008 - 10:12

أولا كل عام وأنتم بالصحة والعافية ومع "في الفن" دائماً، ثانيا اسمحوا لي أن اكتب غير ما هو متوقع مني هذا العام، فأنا لا أرغب في كتابة رسائل إلى أهل الفن كل شخص بذاته على قدر ما أرغب في مشاركتكم أفضل وأجمد اللحظات الفنية التي مرت عليّ خلال 2008.

وطبعاً لكم مطلق الحرية في مشاركتي رأيي أو معارضتي عليه، لكن بكل الأحوال أنا سعيدة بكل شخص فيكم قرأ اسمي وتكبد عناء قراءة سطوري القادمة .. وأشكره بجد ومن قلبي.

أفضل وأجمد اللحظات الفنية التي مرت عليّ خلال 2008:

نظرة "الحنية" في عين عمر الشريف في فيلم "حسن ومرقص".

سماع صوت مطربة جديدة اسمها أمنية سليمان وأغنيتها "الحب بييجي في ثانية". اضغط هنا عشان تشوف الكليب.

أغنية آمال ماهر "أنا بعدك" و"اللوك" الجديد اللي ظهرت بيه في الكليب، بجد سعيد المارووق فعلا بيطلع صورة جامدة أوي، بس لازم أقول آمال شكلها جامد في الكليب كله ماعدا اللقطات اللي بتظهر فيها بشعر "مجعد" وقاعدة على "مورجيحة"، ديه طلعت "أوِت" .. غير كده شكلها بجد جامد، اضغط هنا عشان تشوف الكليب.

إحساس حماقي في أغنية "وافتكرت".

احساسي لأول مرة بوجود فيلم هادف فعلا زي "رمضان حمودة"، وفيلم فيه رسالة رايحة لحد معين زي "طباخ الريس"، ياريتهم يوصلوا!

ألبوم رامي صبري.

جملة "شكلي ظلمت أنا حد زمان ومختش بالي" في أغنية "علامة في حياتك".

سماع جنات لما غنت في برنامج "الدنيا غنوة"، اضغط هنا عشان تشوف البرنامج.

أغنية "بتيجي سيرتك" لنانسي عجرم.

برنامج "الحلم" لعمرو دياب.

إحياء الملك محمد منير أكبر عدد حفلات في حياته عام 2008.

ألبوم سميرة سعيد.

شغل الشاعر نادر عبد الله والموزع هاني يعقوب والموزع أحمد عادل والملحن تامر علي والشاعر أيمن بهجت قمر والشاعر حسام الدين محمد والموزع توما والملحن رامي صبري (وتحديدا لحنه لأصالة "أوقات"، وده غير ألحان ألبومه) والملحن رامي جمال والملحن محمد يحيى والموزع تميم في 2008.

مشهد منة عرفة في "حلم العمر" وهى بتجري ورا "البوكس" اللي كانت فيه أمها هالة فاخر وبتبكي وكانت هتقع أكتر من مرة في الشارع، وائل إحسان إنت بجد مخرج جامد.

كليب "علي" لكارول سماحة فكرني بالفيلم الكلاسيكي "الرقص تحت المطر" Dancing in the rain.

مشهد إحساس تامر حسني بالظلم في "كابتن هيما" لما كان في السجن، عمله بجد أوي.

"جنان" نور في "نقطة رجوع".

أداء أحمد حلمي "الجامد اللي يوجع القلب" في "آسف على الإزعاج".

خفة دم أحمد مكي وإنجي وجدان في "إتش دبور"، رغم إن الفيلم نفسه "فاضي".

عبلة كامل تجسيد حي لمفهوم كلمة "السهل الممتنع".

أفكار المخرج ياسر سامي "المجنونة" في كليباته.

إحساس شيرين بالأمان والاستقرار النفسي اللي ظهروا على صوتها.

عايزة أشارككم معايا في حاجة .. السنة ديه أنا اتعلمت يعني إيه كلمة "صناعة نجم" بجد، ديه فعلا صناعة يا جماعة ليها أساس ومخططات وناس بتاكل عيش من وراها، حوار كبير أوي، ومن خلال خبرتي في الموضوع ده أقدر أقول وبجد والله على ما أقول شهيد .. الفترة الفنية اللي إحنا فيها ديه منهج "صناعة النجم" لا يطبقه في الوسط الفني "بذمة وبضمير وبما يرضي الله" إلا المنتج أحمد الدسوقي.

قناة "فتافيت" برضه عشان هى فعلا قناة جامدة.

هى حاجة مش فنية أوي بس عايزة أقولكم عليها ، كتاب اسمه "مصر ليست أمي .. دي مرات أبويا" للكاتب أسامة غريب، استمتعت بيه آخر حاجة.


تفاؤلاتي لـ 2009: "يا رب وإن شاء الله طبعاً"

في حاجة هتبان ليكم في أول 2009، فاكرين ريهام عبد الحكيم اللي كانت في ألبوم "ميراج هيتس"؟ .. هتشوفوها الكام اليوم اللي جايين دول بشكل بجد بهرني أنا شخصياً.

كليب حماقي "وافتكرت" هيبقى جامد اوي، عشان أنا عارفة مين اللي عامله السيناريو بتاعه، وديه مفاجأة لما هتعرفوها هتحترموا دماغ الراجل ده، حماقي يعني، أكتر.

تامر حسني هيعمل ألبوم جامد وفيلم جامد.

إليسا هتعامل الملحنين والشعراء والموزعين المصريين كويس وهتديهم حقهم وترضيهم، فهيعملوا ليها ألبوم جامد.

شيرين هتعمل ألبوم أغلبيته أغاني حب، بس مش حاسة إني هصدق أغاني الغدر والفراق منها، يارب أبقى غلطانة.

منى زكي هتعمل أول بطولة مطلقة وهتكسر الدنيا.

طارق العريان هيعمل فيلم جديد وهيبقى جامد.

الصحفي والإعلامي الجميل يسري الفخراني هيعمل جرنان تاني هيقلب الدنيا.

طبعا ألبوم عمرو دياب مش محتاج إني أتفاءل عشانه بحاجة .. ما شاء الله.

عمرو مصطفى هيعمل ألبوم جديد المزيكا بتاعته هتعلّم.

فيلم أحمد حلمي الجديد إن شاء الله من المسلمات برضه إنه هيكون جامد.

بالنسبة لأحمد السقا مش عارفة ليه مش متفائلة بفيلم "الديلر"، يمكن عشان سمعت عن كمية المشاكل و"النحس" اللي مسيطر عليه، بس فيلم "إبراهيم الأبيض" هو اللي أنا حاسة إنه هيبقى نقلة زي "الجزيرة".

أنا متفائلة من فيلم أحمد عز الجديد عشان محمد دياب هو اللي بيكتبه، ودياب شاطر فعلاً.

"في الفن" هيبقى أجمد وأشهر وأفضل موقع فني في الوطن العربي كله، وده عشانكم وبيكم ومعاكم.